Il program a Madrid è stà plitost curios, damai ch'il gieu ha cumenzà pir curt avant mesanotg. A l'Americana, Jessica Pegula para il temp da spetga betg d'avair disturbà. La numra 14 dal mund è stada pli ferma che la Svizra. Tuttina ha Jil Teichmann dumagnà da tegnair avert il gieu fin la fin. En omadus sets ha ella pudì gulivar gia baud il gieu. Lura dentant ha Pegula mintgamai dumagnà da gudagnar il service.
Teichmann è stada la terza giada en il mezfinal d'in tal turnier. Il mars da l'onn passà ha ella pers cunter la Tscheca Barbora Krejcikova. 5 mais pli tard a Cincinnati, ha ella cuntanschì il final ch'ella ha pers cunter l'emprima dal mund da quai temp, Ashleigh Barty da l'Australia.
Il mezfinal a Madrid porta a Teichmann en emprima lingia in premi da 311'000 euros. En la nova rangaziun lura vegn ella enavant sin plazza 29 dal mund ed è cun quai classada uschè bain sco anc mai. Fin schaner era ella stada per in'emna sin plazza 31 da la rangaziun mundiala.
Pegula frunta en il final da sonda sin Ons Jabeur da la Tunesia, la numra 10 dal mund.