L'emprima mesadad dal classicher è ida a fin senza gols. Ella è stada dominada da bler tactica e da be paucas schanzas sin omaduas varts. Suenter 15 minutas è il giugader dal champ central Sami Khedira sa blessà ed ha stuì bandunar il plaz. Per el è vegnì Bastian Schweinsteiger.
Gia il 2014 è Khedira sa blessà durant il trenament, uschia ch'el ha manchentà il final dal campiunadi mundial en la Brasilia cunter l'Argentina.
Euro 2016 - GER vs. ITA
Segunda mesadad
Suenter la pausa ha l'equipa tudestga fatg dapli squitsch sin ils Talians. En la 65avla minuta ha lura il giugader dal champ central Mesut Özil fatg igl 1:0 per la Germania.
En la 78avla minuta però ha il schef da la defensiun dals Talians, Leonardo Bonucci pudì egalisar al 1:1 per la «Squadra Azzurra». Quai cun in penalti suenter in hands dal defensur tudestg Jérôme Boateng. Silsuenter n'han omaduas equipas be pli ristgà pauc. Uschia è ì il temp regular a fin pari.
Prolungaziun
Er la prolungaziun è stada dominada da bler tactica, senza ch'ina da las duas equipas avess gì la schanza da decider la partida durant las 30 minutas supplementaras.
Penaltis decidan en favur da la Germania
Il sajettar penaltis è stà in veritabel crimi. Plirs giugaders dad omaduas equipas han demussà gnerva e betg tutgà il gol. La fin finala ha Jonas Hector fatg il penalti decisiv per la Germania. Per la Germania è quai l'emprima victoria cunter l'Italia ad in grond turnier insumma. Dals 8 duels ch’igl ha dà enfin uss a turniers gronds ha l’Italia gudagnà 4. E 4 giadas è la partida ida a fin pari. La davosa giada ha l’Italia bittà la Germania or dal campiunadi europeic en Pologna ed en Ucraina.
Mezfinal cunter Frantscha u Islanda
Gievgia, ils 7 da fanadur frunta la Germania sin il victur da la partida tranter la Frantscha e Islanda che cumenza dumengia saira a las 21:00.
-
Bild 1 von 10. Tut è pront per il classicher. Bildquelle: Keystone.
-
Bild 2 von 10. Sami Khedira è sa blessà suenter in quart d'ura e sto vegnir remplazzà. Bildquelle: Keystone.
-
Bild 3 von 10. Marco Parolo (san.) e Thomas Müller en il cumbat per la balla. Bildquelle: Keystone.
-
Bild 4 von 10. Mesut Özil tutga per la Germania al 1:0. Bildquelle: Keystone.
-
Bild 5 von 10. Özil sa legra da ses gol. Bildquelle: Keystone.
-
Bild 6 von 10. Bonucci dumogna Neuer - 1:1. Bildquelle: Keystone.
-
Bild 7 von 10. Bonucci sa legra da ses gol. Bildquelle: Keystone.
-
Bild 8 von 10. Manuel Neuer parescha il culp da Matteo Darmian. Bildquelle: Keystone.
-
Bild 9 von 10. Hector fa il penalti decisiv per la Germania. Bildquelle: Keystone.
-
Bild 10 von 10. L'equipa tudestga è en il mezfinal. Bildquelle: Keystone.
RR novitads 23:00