Siglir tar il cuntegn

Header

Legenda: Anc 25 onns pli tard sa regorda Peter Philipp gugent vid ils muments olimpics d'Atlanta. RTR
cuntegn

Ultim currider olimpic Peter Philipp – sco sch'i fiss stà ier

25 onns hai duvrà fin ch'in Grischun ha dumagnà en l'atletica leva da sa qualifitgar per gieus olimpics. William Reais ha proximamain sia premiera olimpica en il sprint a Tokio. Entant sa regorda Peter Philipp ch'è currì ad Atlanta ils 1500 meters da ses gieus ch'han impressiunà en blers reguards.

Els èn ina raritad: Participants grischuns a gieus olimpics da stad. E tant sco unics èn els en l'atletica leva. Avant 25 onns è Peter Philipp stà l'ultim currider olimpic grischun. Ils 1'500 meters, sia disciplina da parada. En quella tegna el anc oz il record svizzer en halla. Il plaschair saja stà grond cura che Wiliam Reais ha dumagnà la qualificaziun e ch'in currider grischun possia finalmain puspè viver quest siemi olimpic. Quai di Peter Philipp che presidiescha dentant il BTV Cuira, l'uniun d'atletica leva, nua che Reais ha cumenzà cun currer . Entant ha l'anteriur currider olimpic in biro d'advocatura a Cuira, è bab da trais uffants e raquinta – sco el raquinta era adina puspè a ses uffants – co el ha dumagnà dal pitschen Churwalden dad ir l'onn 1996 als gieus olimpics ad Atlanta ed esser part da quella gronda famiglia olimpica.

Festa d'avertura – mument da pel giaglina

Trais emnas è el stà ad Atlanta. Era lura usit che tut las delegaziuns e naziuns olimpicas stevan l'entir temp dals gieus en il vitg olimpic. Uschia è er Peter Philipp stà da la ceremonia d'avertura fin a quella da finiziun. Surtut vid l'avertura sa regorda el anc bain. Sco Muhammed Ali, segnà da la malsogna da Parkinson, ha envidà cun mauns tremblants il fieu olimpic. In maletg ch'è ì enturn il mund.

audio
Atlanta 1996 na vegn jau mai ad emblidar
04:14 min, Actualitad dals 29.07.2021.
laschar ir. Durada: 04:14 minutas.

En il vitg olimpic ha el partì ina combra cun il currider dad 800 meters, André Bucher e dus canuts. Interessentas sentupadas e paterladas cun sportists d'autras disciplinas. Quel spiert da cuminanza, da sa gidar e sustegnair in l'auter saja propi stà grond. E betg be la part sportiva, era bain en memoria è restà a Peter Philipp la chavaltgadra Christine Stückelberger. La grande dame da la dressura cun numerusas medaglias olimpicas e che gieva schon vers ils 50. Schon bunamain in pau ina sort «mamma dals atlets giuvens» ch'eran l'emprima giada a gieus olimpics. A Peter Philipp ha ella gidà a lavar e far ses resti.

Attatga cun bumba, mument da sgarschur

En il parc olimpic, amez la citad d'Atlanta, hai dà durant ils gieus in attentat. Ina bumba è explodida ed ha mazzà duas persunas e blessà grevamain a passa 100. Peter Philipp e ses team eran ordaifer vid trenar. Meds da communicaziun sco telefonins n'avevian els betg. Uschia ch'i saja stà muments intscherts e lungs fin ch'ins haja savì tge ch'era propi capità quel 9avel di dals gieus olimpics. Cura ch'in satgados cun en ina bumba, deponì sut in banc, è detonà.

Sia cursa olimpica – muments da patir

En sia cursa da qualificaziun ha Peter Philipp duvrà 3:41:60 per ils 1'500 meters. Bunas trais secundas han mancà per cuntanscher il mezfinal. El haja patì, surtut pervia da la chalira. Tuttina saja el currì a ses limit quel di. Dapli na saja betg stà pussaivel. L'emprim trumpà, ma curt suenter ch'el era puspè sa revegnì hajan ils bels muments dominà: L'entira atmosfera en il stadion, la pista da currer olimpica, las tribunas cun massa aspectaturas ed aspectaturs e tranter quels era ses geniturs ch'eran sgulads l'emprima giada en lur vita, vegnids dal pitschen Churwalden en il grond Atlanta per esser part da la premiera olimpica da lur figl.

Sportiv, di Peter Philipp ch'aveva pir in onn avant ils gieus olimpics cumenzà propi a trenar professiunalmain, era el quatter onns suenter Atlanta bler pli lunsch. La qualificaziun per ils gieus a Sydney ha el manchentà be per il nair da l'ungla. Tge ch'haja vilentà e trumpà el. L'onn 2003 ha Peter Philipp terminà sia carriera. Problems cun in det-pe han impedì da currer vinavant sin quist livel.

Ses puncts culiminants

Cler, in dal punct culimant eran ils gieus olimpics 1996 ad Atlanta. In ulteriur: il 6avel plaz al campiunadi d'europa en halla a Stockholm il medem onn. Il 2001 lura la qualificaziun per il mezfinal al campiunadi mundial ad Edmonton ch'el terminescha sco 15avel. Sin palancà naziunal ha Peter Philipp gudagnà tschintg titels da campiun svizzer. Sur 1'500 meters tegna el anc adina il record svizzer en halla (3:38:86). En la glista dals megliers svizzers dadora sur quista distanza è el sin plaz 4 (3:35:87).

RTR actualitad 08:00

Artitgels legids il pli savens

Scrollar a sanestra Scrollar a dretga