Radund treis uras èsi stà ina partida equilibrada avant che Djokovic ha realisà, gist a l'entschatta dal 5avel set, dus breaks en seria. Il service da Zverev n'ha betg pli funcziunà sco giavischà ed uschia èsi era stà simbolic, che Djokovic ha terminà la partida cun in break.
Per il Serb èsi la revantscha per ils gieus olimpics a Tokio. Là aveva Zverev anc battì Djokovic en il mezfinal e silsuenter gudagnà aur en il final.
A la chatscha dal record e dal Grand Slam
Per Djokovic èsi gia il 9avel final al US Open. Il titel ha el gudagnà fin uss trais giadas, l'ultima giada il 2018 cunter Juan Martin Del Potro. La dumengia gioga il numer in dal mund per ils cudischs d'istorgia. Sco emprim giugader dapi Rod Laver il 1969 savess il atlet da 34 onns gudagnar il Grand Slam, vul dir: tut ils quatter gronds turniers aifer ina stagiun.
Entras il titel a Flushing Meadows surpassas Djokovic er cun 21 titels da major Roger Federer e Rafael Nadal, omadus han festivà fin oz 20 titels a Grand Slams.
Medwedew spetga en il final
Il sulet obstachel che spetga anc è il Russ Daniil Medwedew. L'atlet da 25 onns ha battì en il mezfinal il Canadais Félix Auger-Aliassime cun 6:4, 7:5 e 6:2. Per Medwedew èsi il terz final da Grand-Slam – gudagnà n'ha el fin uss nagin. Il favrer aveva il numer dus dal mund pers il final dal Australian Open en trais sets – il victur ? Novak Djokovic.
