Il siemi da Dominic Stricker a New York cuntinuescha: Il Bernais da 21 onns ha gudagnà cunter il Franzos Benjamin Bonzi en tschintg sets cun 2:6, 7:5, 7:6, 3:6 e 6:2. En l'otgavelfinal frunta Dominic Stricker sin il matador local, l'American Taylor Fritz. Independent dal resultat da questa partida, vegn Stricker a figurar per l'emprima giada en sia carriera tranter ils top 100 da la rangaziun mundiala.
Er Belinda Bencic ha cuntanschì l'otgavelfinal da l'ultim turnier da Grand Slam da l'onn. La campiunessa olimpica ha battì la Chinaisa Lin Zhu en trais sets cun 7 a 6, 2 a 6 e 6 a 3. En la proxima runda frunta Belinda Bencic sin la Rumena Sorana Cirstea ch'ha surprendentamain eliminà la Kasaca Jelena Rybakina.
Er Novak Djokovic è sa qualifitgà per l’otgavelfinal dal turnier da Grand Slam a New York. Al Serb èsi gartegià da volver la partida cunter ses cumpatriot Laslo Djere suenter ch’el era gia cun dus sets en retard. La finala ha Djokovic gudagnà en tschintg sets cun 4:6, 4:6, 6:1, 6:1 e 6:3. Fin uss ha Djokovic triumfà trais giadas a l’US Open.
