«Good morning Vail / Beaver Creek»

11 cursas, 11 decisiuns da medaglias entaifer da 14 dis. Quai è il campiunadi mundial da ski alpin a Vail / Beaver Creek.

Logo dal campiunadi mundial da ski alpin 2015. Bild in Lightbox öffnen.

Legenda da maletgs: Logo dal campiunadi mundial da ski alpin 2015. Keystone

En la stretga patria da las mataduras localas Lindsey Vonn e Mikaela Shiffrin cumbatta l’elita dal sport da skis per medaglias ed onur.

Co han las skiunzas svizras ed il skiunz svizzers sa preparà sin las cursas? Tgi va a la partenza, e tgi n’è betg sa qualifitgà? Datti Svizzers che han schanzas sin medaglias, u giogan els mo ina rolla secundara? Sper tut quai vegn era respundida la dumonda davart ils favurits e sclerì las ultimas infurmaziuns avant la cursa.

03.02.2015: Arrivà bain en l'USA

Per esser pront per las emprimas cursas, s’ha la delegaziun svizra fatg schon baud al viadi en ils Stadis Unids. Schon dapi quasi in’emna èn las skiunzas svizras ed ils skiunzs svizzers a Vail / Beaver Creek per s’acclimatisar.

04.02.2015: Las favuritas en stadas top, las Svizras han dischillusiunà

Entaifer da gnanc in onn gudogna Anna Fenninger il titel da campiunessa olimpica e quel da la campiunessa mundiala en la disciplina da Super G. Tar il campiunadi mundial a Vail / Beaver Creek gudogna la skiunza da 25 onns l’emprima medaglia dad aur. Fenninger gudogna il titel avant Tina Maze da la Slovenia e la matadura locala Lindsay Vonn. Nagin pled en chapitel avevan las skiunzas Svizras. La meglra è stada Lara Gut sco 7avla.

05.02.2015: Tge pon ils engiadinais emprender dals americans?

Durant il campiunadi mundial 2015 a Beaver Creek è ina delegaziun da San Murezzan 2017 a Colorado per guardar co ch’ils americans mainan tras quest eveniment da sport. Ils da San Murezzan vulan sa chapescha turnar enavos cun blers buns tips per il campiunadi mundial en dus onns a San Murezzan, ma era cun ideas tge ch’els pon far meglier che Vail/Beaver Creek.

06-02-2015: Hannes Reichelt per l’emprima gia campiun mundial

Era suenter la secunda cursa dal campiunadi mundial da skis alpin a Vail/Beaver Creek spetga la Svizra sin l’emprima medaglia. Sco tiar las dunnas han era ils umens svizzers mussà nagin exploit en il Super-G. Nov campiun mundial è Hannes Reichelt. L’Austriac ha triumfà avant la gronda surpraisa dal di, il canadais Dustin Cook ed il franzos Adrien Theaux.

07-02-2015: Lara Gut gudogna danovamain l’emprima medaglia tar il champiunadi mundial

Terza cursa, emprima medaglia per la delegaziun svizra al campiunadi mundial a Vail/Beaver Creek. Lara Gut fa il sigl sin il podest e gudogna la medaglia da bronz tar la cursa roiala, la cursa rapida. Mo las dominaturas da quest champiunadi mundial, Tina Maze ed Anna Fenninger èn anc pli spertas che Lara Gut.

09-02-2015: Emprima cursa, emprima victoria per Marcel Hirscher

Era sche Marcel Hirscher n’è betg in spezialist da cursa rapida, ed era sche Marcel Hirscher ha pers passa 3 secundas suenter la cursa rapida da la Supercumbinaziun, ha Hirscher gudognà il titel da champiun mundial. Hirscher ha fatg la differenza en il slalom, nua ch’el ha mussà tut sia classa. Hirscher ha dentant era nizzegià la schanza da pudair ir sco emprim en il slalom. Meglier Svizzer è Carlo Janka sco 6avel.

10-02-2015: Tina Maze gudogna sia segunda medaglia dad aur

Tina Maze è fin ussa la gronda figura al campiunadi mundial da skis a Vail/Beaver Creek. La skiunza slovena ha gudagnà ier saira la super-cumbinaziun da las dunnas ed uschia gia sia terza medaglia a quest campiunadi mundial. Tina Maze ha triumfà avant las duas austriacas Nicole Hosp e Michaela Kirchgasser. Lara Gut è suenter il segund plaz en la cursa rapida curada enavos sin il 5avel plaz ed uschia ha ella manchentà ina medaglia.

11-02-2015: L’Austria resta la naziun da skis numer 1

L’equipa ch’è per il mument a la testa dal spievel da medaglias dal campiunadi mundial ha er gudagnà la concurrenza da las naziuns. L’Austria cun ses star Marcel Hirscher ha gudagnà il final encunter ils Canadais. La Svizra ha manchentà la medaglia da bronz be per pauc. En il final pitschen han Gino Caviezel, Wendy Holdener, Michelle Gisin e Justin Murisier pers il duel encunter la Svezia.

12-02-2015: Gino Cavegn da Sedrun sco voluntari al campiunadi mundial

Al campiunadi mundial da skis a Vail/Beaver Creek lavuran bun 2‘300 voluntaris. Tranter quels er in rumantsch, Gino Cavegn da Sedrun. Suenter ses emprendissadi sco electricist ha Gino Cavegn lavurà tar diversas federaziuns da skis. L’emprim ha el trenà il cader regiunal, lura il cader naziunal e la fin dals onns otganta è el schizunt stà trenader assistent da la naziunala Svizra cun las grondas skiunzas Erika Hess, Marie-Theres Nadig e Hanni Wenzel.

13.02.2015: Anna Fenninger per la terza

La skiunza Austriaca Anna Fenninger gudogna la terza medaglia tar il champiunadi mundial a Vail/Beaver Creek. La skiunza da 25 onns ha gudagnà suveran il slalom gigant. Quest è gia il segund titel da champiunessa mundiala per Anna Fenninger, e la terza medaglia tar quest champiunadi. Las skiunzas Svizras n’avevan betg in pled en chapitel. La meglra era Wendy Holdener sco 17-avla.

16-02-2015: Jean-Baptiste Grange è il campiun mundial en il slalom

La medaglia d'aur en il slalom dal campiunadi mundial a Vail/Beaver Creek va al Franzos Jean-Baptiste Grange. Grange gudogna 35 tschientavels avant il Tudestg Fritz Dopfer. Terz è il Tudestg Felix Neureuther. Il top-favurit, l'Austriac Marcel Hirscher è crudà or en la fasa finala da la cursa. Suenter l'emprim percurs manava Hirscher cun in avantatg da 28 tschientavels sin il Russ Alexander Choroschilow. Il sulet svizzer ch'è sa qualifitgà per il segund percurs, Justin Murisier, è vegnì 13avel.