Siglir tar il cuntegn

Vail / Beaver Creek 2015 Il diari da Vail / Beaver Creek

Gia per la terza giada ha lieu in campiunadi mundial da ski alpin en la regiun da Vail e Beaver Creek en il stadi da Colorado. Era sche l’istorgia da la regiun da skis, sco quai ch’ella sa preschenta oz, n'è gnanc uschè veglia.

Bandiera USA sut The Brink sin la pista Brids of Prey.
Legenda: Bandiera USA sut The Brink sin la pista Brids of Prey. Keystone

L’onn 1962 han ins construì qua l’emprima telecabina. Pir lura è la regiun propi vegnida populada. In mez tschientaner pli tard ha Vail / Beaver Creek il num dad esser il San Murezzan dals Stadis Units. San Murezzan è era il lieu da partenadi da Vail / Beaver Creek. Mo derasa il lieu er la glischur e la gloria da l’original en Engiadina Auta?

S’entaupan stailas e stailettas er durant il campiunadi mundial da skis a Vail / Beaver Creek? Tge datti tut da raquintar sper las cursas sin la muntogna? Noss redacturs raquintan mintga di da lur experientschas fatgas sper la pista.

Diari dals 03.02.2015

Fotografia dal bus che ha transportà noss reporters da Denver a Beaver Creek.
Legenda: Il bus che ha transportà noss reporters da Denver a Beaver Creek. RTR, A. Wieland

Per la terza giada ha il campiunadi mundial da skis lieu a Vail / Beaver Creek en il stadi american da Colorado, pia betg gist tar nus avant chasa. Durant las proximas duas emnas vegn cumbattì en il nord da Denver ed al pe dals Rocky Mountains per medaglias. Betg mo fatg il viadi sur mar, han skiunzas e skiunzs, mabain era noss dus reporters da sport Roman Dobler ed Andreas Wieland. In viadi in pau turbulent...

Diari dals 04.02.2015

Cuntrada da Beaver Creek
Legenda: Beaver Creek Vista sin las pistas da skis da Beaver Creek KEXSTONE

Il territori da skis da Beaver Creek è in dals pli gronds ed enconuschents territoris da skis en l’America. Igl è in territori da luxus, il San Murezzan da l'America dal Nord. Beaver Creek sa chatta sin bun 2'500 meters sur mar, il territori da skis va fin a 3'500 meters sur mar. L'aria e la naiv al pe dals Rocky Mountains è pil sitga.

Diari dals 05.02.2015

Vista sin Vail, ina gronda gruppa da chasas gist a la muntogna cun las pistas da skis.
Legenda: Vista sin Vail. KEYSTONE

Entaifer da mo in mez tschientaner è la regiun da skis Vail e Beaver Creek creschidas a la pli gronda en ils Stadis Unids. Quai ch'ha cumenzà a l'entschatta dals onns 60 fitg pitschen e modest è creschì tar in enorm resort. In resort nua ch'ils fans dal sport da skis e da snowboard vegnan da tuttafatg sin lur custs.

Diari dals 06-02-2015

Vail e Beaver Creek, la pli gronda regiun da skis en ils Stadis Unids da l'America spetga sin ils giasts cun in unicum. En l’America datti la colliaziun directa da l’hotel sin pista. Las sutgeras, las gondlas portan ils giasts direct sin la muntogna. Ins ha la pussaivladad dad ir da la chombra direct sin pista.

Diari dals 09.02.2015

America è il terz grond pajais dal mund. Il stadi Colorado, al lieu dal campiunadi mundial da skis, è quasi uschè grond sco l'Italia. Las dimensiuns en l'America èn tut autras che quellas che nus enconuschain en Europa. La distanza da l'ost al vest importa radund 5000 kilometers, quai è quasi la distanza tranter Lissabon e Moskau. America è grond ed ils americans aman il grond. «Big is beautiful», grond è uschè bel – in dals mottos dals americans. E quai vala sa chapescha er per autos. Pli grond l’auto tant meglier ch’el è.

Diari dals 10.02.2015

Dapi bunamain in’emna èn noss reporters da sport en l’America al champiunadi mundial da Vail/Beaver Creek. Plaun a plaun emprendan els d’enconuscher meglier la mentalitad americana elas atgnadads da la glieud che vivan en il terz grond pajais dal mund. Ier ha Roman Dobler raquintà da l’amur dals Americans per autos gronds. Oz raquinta el dal gust da far il BBQ e da mangiar in bel steak o filet.

Diari dals 11.02.2015

Show, spectacul, decoraziuns extremas, bler colurs – tipic american. E quai dastga sa chapescha era betg mancar al campiunadi mundial da skis a Vail / Beaver Creek. Saja quai sin la tribuna en l’arrivada, a l’ur da la pista u schizunt giudim e sisum las pendicularas, dapertut vegn procurà per buna luna e curt'urella.

Diari dals 12.02.2015

Dad ina vart dal cunfin flureschan ils casinos, da l’autra vart èsi scumandà da baiver alcohol ora en il liber. Las leschas en ils 50 stadis da l’American èn fitg differentas. Quai che vala qua è scumonda da l’autra vart dal cunfin e cuntrari. A Colorado per exempel èsi legal dapi il principi da l’onn da vender e consumar cannabis.

Diari dals 13.02.2015

Beaver Creek è in lieu da luxus, il San Murezzan da l’America. Ils hotels èn fitg nobels, stizuns datti praticamain be da marca. Per ils giasts vegn dentant fatg bler, fitg bler. Ils Americans vulan sa mussar da sia meglra vart en quest lieu turistic d’enviern. Insatge tut spezial è ch’ils passapes sco era la zona da peduns amez il vitg è stgaudada. Uschia ch’i ha nagina naiv sin via e la glieud po ir tras Beaver Creek cun chalzers bass. Pia, schelar pes a Beaver Creek na sto nagin.