Ils giugaders dal Club da hockey da Tavau han menziunà suenter la seria persa cunter ils ZSC Lions che la fortuna haja mancà. La fortuna pon ins dentant era sfurzar da l’atgna vart. Al HCD ha mancà la classa. L’equipa grischuna ha mintgamai investì bler per vegnir a schanzas. Quellas na avevan dentant betg uschè ina gronda qualitad davant il gol. Igl ha da fitg paucs rebounds, u pucks ch'ins avess pudì chavar ora e spedir en x-ina furma en il gol. Davant il gol, là nua ch'i fa mal e vegnì pauc dal HCD.
Il HCD ha manchentà la finamira da far il proxim pass
Suenter ch'il HCD era avanzà la stagiun passada en il mezfinal vuleva l’equipa grischuna far quai er questa stagiun. Ils ZSC Lions han dentant fatg al Club da hockey da Tavau in stritg tras il quint. Suenter l’era dad Arno Del Curto as ha il HCD mess si nov. Quatter stagiuns suenter il debachel da la stagiun 2018/2019 nua ch'il HCD ha a la fin stuì ir en la qualificaziun per restar en la National League han tuts spetgà dapli dal HCD. Ils responsabels sin e sper il glatsch, dentant era ils fans. La seria cunter ils ZSC Lions ha dentant mussà er fitg bain las relaziuns dal HCD.
Tge resta da la stagiun 2022/2023
Da la stagiun resta ch'il HCD as ha qualifitgà directamain per ils playoff. En questa liga, nua che tut las equipas èn anc creschidas pli ferm ensemen è quai segira in success. I resta dentant era ch'il HCD ha pudì magunar la relaschada dal trenader Christian Wohlwend curt avant ch'ils playoffs han cumenzà senza gronda fadia. La relaschada da Wohlwend n’ha dentant er betg procurà per enorms impuls. E per finir era il fatg che questa equipa dispona dad enorm bler caracter. Numerusas giadas è quai gartegià al HCD da storscher in retard, u da sa salvar en ina prolungaziun. Totalmain ha il Club da hockey da Tavau dà 21 prolungaziuns. Quai mussa pelvair ch'il caracter en l’equipa constat.
