Siglir tar il cuntegn

Header

cuntegn

Vanessa Bolinger Vacanzas en Caribica empè da hockey en il Canada

La golia dal Cdh Engiadina Vanessa Bolinger è stada nominada per l’emprima giada per in campiunadi mundial. Il turnier è dentant vegnì spustà sin l’avust. Sinaquai ha ella cudeschà vacanzas en la Caribica.

La surpraisa è stada gronda cura ch’il trenader da la squadra naziunala da las dunnas, Colin Muller, ha nominà Vanessa Bolinger pel campiunadi mundial en Canada. Gia durant l’enviern ha la golia dal Cdh Engiadina en la segunda liga dastgà purtar il dress da la squadra naziunala - era durant duas partidas cunter la Germania. Ch’ella po dentant ir cun la naziunala al campiunadi mundial en il Canada è tuttina stà ina gronda surpraisa.

Spustà il campiunadi mundial l’ultim mument

Las dunnas da la squadra naziunala eran quasi gia a Turitg per prender il sgol vers il Canada, cura che la Federaziun Internaziunala da hockey ha annullà il turnier. Sin squitsch da giugadras da las naziuns grondas è il turnier alura vegni spustà sin l’avust. Precis quai è uss il problem da la giuvna golia dal Cdh Engiadina: Per il campiunadi mundial en il Canada aveva Vanessa Bolinger prendì in mais vacanzas. Per il mument statt en las stailas, sch’ella pudess far quai anc ina giada l’avust. Vitiers vegn ch'il program da la naziunala è a partir da l’avust en mintga cas stretg: Il proxim enviern spetgan numnadamain ils gieus olimpics a Beijing, IL eveniment insumma per mintga sportista e per mintga sportist.

audio
Far vacanzas empè da campiunadi mundial
03:28 min, Actualitad dals 04.05.2021.
laschar ir. Durada: 03:28 minutas.

Vacanzas empè da hockey

Perquai che Vanessa Bolinger aveva preparà per esser in mais en il Canada ha ella uss midà ils plans: Ella ha cudeschà in sgol en la Caribica. Enstagl da star las proximas emnas en Canada en il gol da l’equipa naziunala, vegn ella uss a scuvrir la Republica Dominicana.  










 

RTR actualitad 17:00

Artitgels legids il pli savens

Scrollar a sanestra Scrollar a dretga