11 mais n'han las equipas da hockey en las ligas pli bassas betg pli pudì dar partidas da hockey. Cun il cumenzament da la nova stagiun da hockey era en las ligas pli bassas, è quest lung temp senza gieus da hockey uss a fin. Tut las squadras grischunas èn puspè en acziun. Dapertut en il Grischun curran giugaders da hockey puspè suenter al puck.
Engiadina gudogna cunter Illnau-Effretikon
Cun ina victoria da 4:2 cunter Illnau-Effretikon è il CdH Engiadina partì en la nova stagiun. Quai suenter che l’equipa indigena è l’emprim ida en retard. Fin en la 32avla minuta ha l’equipa engiadinaisa dentant savì storscher la partida, ed alura betg pli dar or da maun l’avantatg. Era sch'ils arbiters han tschivlà numerus chastis encunter omaduas equipas.
Partenza grategiada, bel da dar cun public
Suenter l’emprima partida dal nov campiunadi ha il CdH Engiadina ils emprims trais puncts sin il conto. Bel n'è per l’equipa grischuna betg mo il start, dentant era ch'il public sa puspè vegnir en las hallas da glatsch a mirar hockey live. Cun certificat da covid e las reglas da ‘3G’ è puspè turnada vita en las hallas da glatsch, vita che motivescha era ils giugaders da dar forsa anc meglier a hockey.