Era la partida cunter il HC Lugano ha cumenzà mal per il Club da Hockey da Tavau. Er encunter Lugano è il HCD l’emprim ì en retard. Anc en l’emprim terz ha Tavau dentant egualisà la partida e quai anc cun in giugader damain sin il glatsch che Lugano. Per Dennis Rasmussen era quest l’emprim ‘shorthander’ da la stagiun.
Stort il gieu en il terz d’amez
Il pari ha dà schlantsch a l’equipa grischuna, en il segund terz ha la squadra dal trenader Christian Wohlwend stort il gieu. Raphael Prassl ha pudì far il 2:1. Era sch'il HCD ha fatg vinavant squitsch n'è in ulteriur gol betg pli gartegià. Il gieu è restà stretg ed omadus equipas han gì lur schanzas. En questa fasa dal gieu han ins vis ch'il HCD vuleva per tut pretsch la victoria. Uschia è il patrun da chasa currì vinavant e n'ha betg pli laschà bler plaz als Tessinais. Per finir ha il capitani Andres Ambühl er anc fatg ses gol. Er il 3:1 era in uschenumnà ‘shorthander’.
Victoria impurtanta per ina plazza da playoff
Suenter la buna entschatta en il campiunadi e prestaziuns fermas l'october da l’onn passà sto Tavau cumbatter durant l’onn nov pli ferm per ina victoria. Suenter ch'il HCD era curt temp a la testa da la tabella è l’equipa grischuna crudada sin plazza sis da la tabella. Quai è l’ultima plazza che garantescha direct ils playoffs. Quella plazza vul il HCD defender durant il rest da la qualificaziun per esser segir da la partida en la fasa decisiva dal campiunadi. Perquai è la victoria cunter Lugano uschè impurtanta. Cun la victoria ha Tavau pudì defender plazza sis da la tabella ed uschia suttastritgar l’ambiziun da vulair sa qualifitgar direct per ils playoff. En la fasa da qualificaziun restan anc sis partidas.