Encunter la Germania n’ha la Svizra betg giugà sin quest livel sco anc en la fasa da gruppa, er betg uschè disciplinà. Per part è l’equipa er stada bloccada e n’è uschia betg pli vegnida da reagir suenter ch’ils Tudestgs èn ids cun 3:1 en avantatg. Er ha la persvasiun d’anc ina giada pudì volver il gieu ha mancà.
Puspè vegnids franads dals Tudestgs
I n’è betg stà l’emprima pitra terrada encunter ils Tudestgs en in gieu decisiv ad in grond turnier. Gia als gieus olimpics il 2018 a Pyeongchang sco er al campiunadi mundial il 2021 è l’equipa vegnida franada dals Tudestgs en l’emprim gieu da K.o. Ins pudess manegiar ch’ils Svizzers han per il vair in trauma dals Tudestgs. Er la vart mentala na pleda en tals muments betg per la Svizra.
Sche betg cun quell’equipa, cura lura?
En mintga cas fiss stà pussibel bler dapli, cunzunt cun questa equipa. La Svizra ha pudì trametter a Riga la meglra equipa pussibla cun tut ils stars da la NHL. Mo gist en il gieu decisiv da quartfinal n’han quels giugaders sco Nico Hischier, Denis Malgin u er il capitani Nino Niederreiter betg pudì persvader sco quai ch’ins ha spetgà e ch’i avess duvrà per batter la Germania.
Als Svizzers na resta uschia nagut auter che dad ir sur ils cudeschs e far meglier al proxim campiunadi mundial il 2024 en la Tschechia. Che la Svizra ha il potenzial da gudagnar ina medaglia, sco gia il 2013 ed il 2018 cura ch’i veva mintgamai dà argient, ha l’equipa mussà en la fasa da gruppa cun avair gudagnà sis da set gieus, tranter auter encunter il Canada e la Tschechia, dus dals gronds en il mund da hockey.
1/4-final: Svizra perda encunter Germania 1:3
En il quartfinal è il siemi d'ina medaglia al campiunadi mundial da hockey ì a fin per la squadra da Patrick Fischer. La Svizra ha pers la partida cunter la Germania cun 1:3. Uschia va il campiunadi mundial da hockey a Riga e Tampere a fin suenter avair giugà ina fasa da gruppa quasi perfetga cun sis victorias.
Fasa da gruppa cun 6 victorias en 7 gieus
En l'ultim gieu da la fasa da gruppa n'èsi stà nagut cun set victorias en set gieus per la Svizra. Encunter ils Lettons han ils Svizzers pers l'ultim gieu da gruppa cun 3:4 suenter prolungaziun. Durant ch'i n'è ì per nagut pli per la Svizra en quest davos gieu da gruppa ha la Lettonia stuì gudagnar almain in punct per cuntanscher la fasa da K.o. En il quartfinal frunta l'equipa da Harijs Witolinsch, ch'ha giugà la fin dals onns 90 per il EHC Cuira e ch'ha trenà il 2019 per intgins mais il HCD suenter l'èra Arno del Curto, a chasa a Riga sin la Svezia, il grond favurit.
Sin la Svizra spetga en il quartfinal la Germania ch'ha terminà la gruppa A sin il quart plaz. Ils Tudestgs han declassà en il davos gieu da gruppa la Frantscha cun 5:0 ed uschia cuntanschì cleramain la fasa da K.o., quai suenter ver pers ils emprims trais gieus. Encunter il Tudestgs cumenza tut puspè tar nulla. E cun la Germania ha spetgà in adversari ch'ha bain savens vilentà ils Svizzers als davos gronds turniers.
Svizra gudogna cunter Tschechia
Al campiunadi mundial da hockey sin glatsch a Riga ha l'equipa naziunala svizra era gudagnà il sisavel gieu da gruppa, quai cunter la Tschechia cun 4:2. Cunquai ha l'equipa da Patrick Fischer er battì, suenter il Canada, la segunda ferma equipa en questa gruppa B.
Grazia a quella victoria vegnan ils Svizzers a terminar la fasa da gruppa sin l'emprim plaz, sco gia il 2022. Lura era l'aventura campiunadi mundial dentant stada a fin suenter il quartfinal. Quel veva la naziunala svizra pers encunter ils Americans cun 0:3.
L'equipa naziunala svizra era gia sa qualifitgada per il quartfinal avant ch'ella ha dà sia 5avla partida cunter il Canada. Era gia sa qualifitgads per il quart final èn la Tschechia ed il Canada, en l'autra gruppa ils Stadis Unids, la Svezia e la Finlanda.
Qua tut ils resultats da l'equippa Svizra e las datas per ils proxims gieus:
Ils quatter megliers da la gruppa B dattan suenter cunter ils quatter megliers da la gruppa A. Tar in pari da puncts en la rangaziun vala la scuntrada directa.
Campiunadi fiss atgnamain stà a Petersburg
Il campiunadi ha lieu a Riga ed a Tampere. Atgnamain avess el duì esser a Petersburg, l'uniun internaziunala da hockey ha dentant midà quai suenter l'attatga da l'armada russa sin l'Ucraina.
L'equipa svizra vegn manada dal trenader Patrick Fischer. Er cun da la partida èn Nino Niederreiter e Denis Malgin ch'han fin avant curt gioga en la NHL. En tut èn 25 giugadurs al campiunadi mundial per la Svizra.
