Il mountainbiker da 26 onns dal chantun Son Gagl ha gudagnà quest davos plaz partenza intern encunter Lukas Flückiger e Fabian Giger che ston uschia star a chasa. L’argument per Lars Forster saja stà sia buna prestaziun a la cursa da la cuppa mundiala a Lai, uschia il trenader naziunal Bruno Diethelm. Forster, il collega d’equipa da Nino Schurter, ha cuntanschì a Lai, malgrà in defect tecnic, il 15avel plaz ed è uschia stà il quart meglier svizzer.
Trio rumantsch a la partenza
Tut en tut dastgan 32 atletas ed atlets da Swiss Cycling ir a la partenza als campiunadis mundials ch’èn dals 28 d’avust fin ils 1 da settember. A las cursas da cross country van tranter auter er a la partenza il favurit Nino Schurter en la cursa d’elita ed il duo Vital Albin ed Ursin Spescha en la cursa dals U23.