La Svizra po organisar ils campiunadis europeics da ballape da las dunnas il 2025. Quai ha il comité executiv da la UEFA decis.
Per las ballapedistas svizras vegn in siemi realitad. 17 onns suenter ils umens duain era ellas dastgar dar in grond turnier da ballape a chasa. La UEFA Women’s EURO 2025 è il pli grond eveniment da sport da dunnas da l’istorgia en la Svizra.
La concurrenza
La surdada era vegnida spustada dal schaner sin l’avrigl perquai che l’UEFA leva anc in budget detaglià da mintga candidatura. En il cas da la Svizra han Confederaziun, chantuns e las citads nua ch’ils gieus avessan lieu gia empermess in sustegn da fin a 50 milliuns francs. Era s'annunziadas eran:
- Pologna: Ensemen cun l’Ucraina han ils Polacs organisà il campiunadi europeic dals umens il 2012. In campiunadi europeic da dunnas fiss stà ina premiera.
- Danemarc, Finlanda, Svezia e Norvegia: Mintgin da quels quatter pajais ha gia pudì organisar ina giada in tal turnier, la davosa giada la Svezia il 2013.
- Frantscha: Suenter ch’ils Franzos han gia dastgà manar atras il 2019 il campiunadi mundial da las dunnas leva la Federaziun franzosa uss er esser l’ospitant dal campiunadi d’Europa.
Il lieus da gieu pussibels
En Svizra vegn giugà a Basilea, Berna, Genevra, Lucerna, Sion, Son Gagl, Thun ed a Turitg. Losanna è la finala sa retratg perquai ch’i vegn organisà là la stad 2025 la festa federala da gimnastica.
Sco ospitant dal campiunadi europeic 2025 è la naziunala svizra da las dunnas cun lur trenadra Inka Grings automaticamain qualifitgada per quest turnier. I daventa la terza participaziun en roda per las ballapedistas svizras.