Siglir tar il cuntegn

Header

video
RTR per ils pitschens: Impressiuns dal chalender d'advent
Or da Uffants dals 25.10.2021.
laschar ir
cuntegn

Lain chantar ensemen Sguard davos las culissas da la producziun dal chalender d'advent

Tge auda tut tar ina filmada? Vid tge ston ins ponderar? E co guarda quai ora sin uschia in set da film? Vus chattais qua intginas impressiuns da la filmada per il chalender d'advent da RTR.

Tge dovri sco prim per pudair realisar in chalender d'advent per uffants? Precis in'idea ed in concept. L'idea da crear in chalender d'advent audiovisual per uffants è vegnida da Flavia Walder, ina dunna plain energia e schlantsch, che dirigia differents chors d'uffants e giuvenils en Surselva. Sia idea? 24 portas cun chanzuns e versets per uffants preschentadas uschia ch'ils uffants pon chantar cun, emprender ils differents moviments e participar activ ensemen cun lur amis, famiglias, manaders e manadras da canortas ubain cun lur scolastas e scolasts.

Jau hai cumenzà la stad cun rimnar las chanzuns e crear ideas per il chalender d'advent e sun ussa fitg spannegiada sin il resultat final.
Autur: Flavia Walder

Ensemen cun il team da RTR è alura naschida l'idea per il concept da questas 24 portinas. Silsuenter èsi stà d'organisar la realisaziun e la filmada. Pia, chattar in bun e bel lieu, organisar ina persuna che po far la camera e registrar il tun, organisar decoraziun da Nadal gia il settember, identifitgar ed eleger las chanzuns ed ils versets, far emprovas ed in scenari per la filmada e, e, e...

Durant la filmada sto alura mintga detagl constar, mintga rucla sto avair ses lieu, las dretgas chandailas esser envidadas e natiralmain las chanzuns ed ils versets tunar bain e correct. Enfin che quai è uschia lunsch po quai dar ch'ins sto repeter ina scena duas trais giadas. Silsuenter vegn alura la meglra scena tagliada ensemen per la finala alura emetter e publitgar las 24 portinas sin rtr.ch/uffants. Gist questa lavur faschain nus ussa il mument. Preparar e tagliar las scenas, tscherner maletgs e layouts per pudair emetter ellas a partir dal prim da december.

Jau ma legrel sin la publicaziun dal chalender a partir dal december sin rtr.ch/advent e spetg plain mirveglias sin ils resuns dals uffants e da las famiglias.
Autur: Tamara Deflorin scheffa communicaziun e marketing RTR

Avais vus survegnì gust d'era guardar il chalender d'advent? T'annunziai qua per la newsletter da RTR – uschia na machentais vus betg l'emprima porta a partir dals 01-12-2021.

Artitgels legids il pli savens

Scrollar a sanestra Scrollar a dretga