Lego - il pli renumà termagl dal mund. Quai enconuschan tuts. La pitschna tscheppa da far termagls datti gia dapi passa 50 onns. Ed ella è anc oz per blers il hit. Sin l'entir mund datti uschè blers Legos che mintga carstgaun avess en media 62 tscheppa/tscheps da far termagls.
L'istorgia
Cumenzà ha tut il 1916 en in pitschen lavuratori a Billund (Danemarc). Là produciva il scrinari-artist Ole Kirk Christiansen stgaffas, ischs e fanestras. Ils emprims onns funcziunava tut bain. Tuttenina hai dentant dà ina gronda crisa d'economia sin l'entir mund. L'affar dad Ole Kirk Christiansen na girava betg pli uschè bain e la fin finala ha el stuì relaschar tut ses impiegads.
Suenter ha el cumprà ina nova maschina ed ha cumenzà a fabritgar stgalas, aissas da stirar ni era sutgas da lain. El ha dentant era anc cumenzà cun insatge auter: cun il material che restava ha Ole Kirk Christiansen fabritgà termagls.
El ha fatg pitschnas stgalas, pitschnas aissas da stirar e magari era in jojo u andas da trair suenter.
Il num
Il 1932 ha el alura decidì da far in nov affar e da sa concentrar dal tuttafatg sin termagls. Per quest nov affar ha el inventà il num: Lego.
Quei num deriva dal danais "Leg godt" e vul dir "gioga bain".
L'affar girava fitg bain il lavuratori è vegnì pli e pli grond ed Ole Kirk Christiansen ha gì spert blers lavurers.
La naschientscha
Lego fabritgava differents termagls, oravant tut dentant pitschna tscheppa da lain.
Ole Kirk Christiansen era però à la tschertga d’in auter material per la tscheppa. El ha experimentà cun differents materials ed è la fin finala sa decidì per il plastic. Plasitc aveva dus gronds avantatgs: el è fitg resistent ed el sa lascha furmar bain.
Il success
Quai ha revoluziunà las chombras dals uffants. La tscheppa melna, blaua e cotschna era fitg leva, ins ha pudì chatschar ensemen ella ed uschia bajegiar da tuttas sorts. L'emprim pudevan ins mo cumprar la tscheppa en il Danemarc e mo en duas grondezzas. Quai eran quasi ils basats e las basattas dals Legos dad oz.
Pli tard lu ha Godfred Kirk Christiansen, surpiglià la fatschenta da ses bab. El ha perfecziunà il sistem e la tscheppa da Lego.
Oz datti sper la simpla tscheppa era rodas, motors ed umets da Lego.
Lieur da Pasca ord quadrins