Pleds instigants - Hate Speech – Odi en l’internet
Schebain sin Tiktok, Snapchat u Instagram – Hate Speech è dapertut.
Pleds instigants pon offender ina persuna psichicamain ma era fisic. Mo da nua vegn l'odi insumma e tge pon ins far encunter?
Violenza virtuala en furma da pleds – quai è Hate Speech. Il pled instigant en l'internet attatga persunas pervia da lur caracteristicas d’identitad, pia chaussas ch'ins na po betg simplamain midar vi d’ins. La finamira da Hate Speech è l'uschenumnà «Silencing». Il messadi d’odi vul per l’ina che persunas ch'han in’autra opiniun taschan e per l’autra stgatschar ellas or dal mund digital.
Pacs delinquents, blers commentaris
Il pli savens chatt’ins Hate Speech en las medias socialas. Persunas che derasan commentaris plain odi datti cleramain fitg paucas. Ellas scrivan però bler dapli commentaris che las persunas paschaivlas ed han perquai era ina ferma preschientscha.
Co reagir endretg?
Era giuvenils, ch'èn en las medias socialas entaupan Hate Speech. Reagir endretg sin commentaris plain odi, n’è betg simpel. Sophie Achermann, mainafatschenta da la fundaziun Public Discourse Foundation, declera: la meglra reacziun sin Hate Speech è il «Counter Speech» pia la replica da buna maniera.
Anja Nunyola Glover, sociologa e podcasterinè adina puspè victima da Hate Speech. Era ella s’engascha per ch'i dettia dapli persunas che scrivan positiv en las medias socialas. Pertge sch'adina dapli persunas cumbattan encunter il odi, ha el adina pli pauc effect.
Infurmaziuns per persunas d’instrucziun:
Avrir la boxSerrar la box
Plan d’instrucziun 21:
Ils scolars e las scolaras ...
ERG.2.2d: ... pon identifitgar il mintgadi discriminaziun ed enconuschan las reglas da discutar (p.ex. schanzas, access, exclusiun, diever linguistic, discriminaziun, emancipaziun, dretgs, interess, basegns).
ERG.5.2c ... enconuschan ils facturs che favuriseschan la discriminaziun ed abus e reflecteschan lur agen cumportament (clischés, pregiudizis, dependenza, violaziun).
ERG.5.4d: ... emprendan d'analisar influenzas sin causas pussaivlas e pon sa distanziar (p.ex. manipulaziun, trends da moda, sforz da gruppa, mobing).
Ml.1.1d: ... enconuschan las reglas, pon distinguer ils sistems da valurs differents da contexts socioculturals e famigliars, e pon era reflectar ed agir tenor quels (p.ex. netichetta, valurs en il mund virtual).
Ml.1.e:... èn abels da numnar schanzas e ristgs da l’utilisaziun da las medias e pon agir sez tenor quellas (p.ex. contacts, communicaziun, cybermobing, debits, potenzial da dependenza).
Roms: Etica, Religiun, medias ed informatica, cuminanza
Stgalim: Sek l, Sek ll
Chavazzin: hate speech, pled instigant, fake news, commentari, social media, silencing, online hate speech, utilitaziun da las medias