Istorgias, savida e quiz - A Trun van las tartarugas a durmir

Primavaira

Laila, Adina e Lou han animals da chasa zunt spezials. Els pon vegnir vegls, èn plitost plauns e dorman prest l’entir enviern. La primavaira vegnan las 17 tartarugas or da la sien d’enviern. Las trais giuvnas han preparà cun ils geniturs il curtin per ils reptils.

A Trun han las tartarugas passentà l’enviern en ina chasa da curtin isolada. Ils Maissens han emplenì la chasa cumplainamain cun figlia da fau – quella e la figlia da ruver na fan numnadamain betg miffa. Impurtant è quai perquai ch’i na dastga betg schelar.

Stad

Laila, Adina e Lou guardan da las tartarugas. Las buobas pavlan ils reptils cun ervas e flurs e dattan aua da baiver. Ellas san exact tge che «Uga» e co. han il pli gugent. Durant il di èn las tartarugas ordadora e giaudan il sulegl, la saira van ellas en lur chasa. La mamma, Silvia, controllescha lura che tuttas sajan en – là èn las tartarugas protegidas dals animals da rapina che vegnissan la notg.

La stad èn las tartarugas pli alertas che tar l’emprima visita dal Minisguard. Sco tut ils reptils dovran era las tartarugas il chaud. I sa tracta dad animals poichilotermics, quai vul dir che lur temperatura dal corp sa mida cun la temperatura dal conturn. E sch'i vegn ina giada memia chaud sa chavan ellas en la terra.

Atun

L’enviern stat davant porta. Per las tartarugas vul quai dir: sa preparar per l’ibernaziun – uschia numnan ils scienziads la sien d’enviern. Las inas pli baud e las autras in zic pli tard sa chavan en la terra. Per Laila, Adina e Lou dat quai ina simpla, ma impurtanta incumbensa: Ellas ston dumbrar las tartarugas e far la segira che tuttas sajan en chasa isolada e betg pli en il curtin.

Cur che tuttas èn en chasa vegn quella emplenida cun figlia da fau u ruver e lura pon las tartarugas durmir. En tschintg mais, il mars vegnan ellas lura puspè ora. Buna notg, fin l'auter onn.

Fotografias che fan dir «Jöööh»

Or da l'archiv: per rumantsch, tudestg e franzos