Gievgia
Oz han ils uffants ils mauns plain da far cun las preparaziuns per la premiera. Las scolaras ed ils scolars mettan davent il material da filmar e tagliar, plazzan ina massa sutgas per il public e decoreschan la sala. Cun la festa finala va l’emna dal Minisguard sin visita a fin. A tuts restan massa bels muments ed in'emissiun fatga dals uffants da la Val Lumnezia.
Mesemna
Oz han ils scolars e las scolaras fatg ina massa differentas chaussas. Mintga scolara e mintga scolar ha dastgà bajegiar in agen radio DAB+. Ina gruppa ha preparà las moderaziuns, intgins uffants han taglià las contribuziuns a fin ed ina gruppa ha dissegnà sin la plazza da scola in maletg per l'introducziun dal Minisguard. Cun bler sulegl, buna luna e gronda motivaziun va nossa emna plaun plaunet vers la fin.
Mardi
Camera pronta ed action! Il mardi han las bleras gruppas finalmain pudì cumenzar a filmar. Saja quai en cuschina, sin plazza da scola u schizunt a la mar lumneziana. Hä, tge!? Ina mar en la Val Lumnezia? Las aspectaturas ed ils aspectaturs a chasa pon pia avair mirveglias tge contribuziuns che las scolaras e scolars vegnan a preschentar en il Minisguard da sonda proxima.
Glindesdi
Oz ha la grond’aventura «Minisguard sin visita» en la scola primara da Cuschnaus cumenzà. Ils 15 scolars e scolaras da la Val Lumnezia produceschan da glindesdi enfin gievgia in’entira emissiun da Minisguard. Scriver concepts, filmar, moderar e tagliar – tut fan ils scolars e las scolaras sez. Il team da Minisguard è natiralmain qua per sustegnair.
Cumenzà ha il project cun drizzar en tut la tecnica, concretisar las ideas da las filmadas e d’emprender d'enconuscher in a l’autra.
Il resultat datti da vesair questa sonda saira ils 6 da matg 2023 a las 17:40 sin SRF1 u gia ordavant la gievgia saira ils 4 da matg 2023 a las 17:00 en la sala da scola a Cuschnaus.
