Tge spetga las scolaras ed ils scolars da la 5 e 6avla classa da Lantsch durant quest'emna speziala? Ensemen cun collavuraturas e collavuraturs da RTR han ils uffants realisà in'entira emissiun da Minisguard. Durant differents workshops han els emprendì a filmar e tagliar contribuziuns, a moderar, co che la tecnica funcziuna ed sco far il marketing per la premiera da lur emissiun.
Qua il diari da quest'emna speziala dals 21 fin ils 24 da november:
Glindesdi, ils 21 da november
Cun buna luna e grond plaschair da cumenzar l'emna da project han ils scolars e las scolaras beneventà il team da RTR glindesdi damaun en lur scola a Lantsch. Uschespert che tut la tecnica è stada pronta han las gruppas cumenzà a preparar las contribuziuns. Ina gruppa ha zambregià bellas invitaziuns per la premiera per lur famiglias ed amis. Il team «davos las culissas» ha oz schizunt schon cumenzà a filmar.
Jau ma legrel fitg sin quell'emna da project.
Mardi, ils 22 da november
Cumenzar baud e rir bler. Il segund di en la scola a Lantsch ha gia cumenzà la damaun a las set cun l’emprima filmada en l'auto da posta da Mon a Lantsch. Las ideas graficas èn daventadas maletgs ed insumma è il mardi il di nua che tut vegn filmà ed intginas contribuziuns gia tagliadas. L’emissiun survegn plaunet furma e las scolaras ed ils scolars survegnan adina dapli e dapli savida da far films.
Il meglier plascha a mai da filmar e da far intervistas.
Mesemna, ils 23 da november
Oz han ils scolars e las scolaras fatg ina massa differentas chaussas. Ina gruppa è stada a filmar en il territori da skis, intginas gruppas han taglià las contribuziuns ed ina gruppa ha dissegnà il toc explicativ cun noss graficher. Sper tut quai ha mintga uffant dastgà bajegiar in agen radio DAB+ – in dals highlights da quest'emna.
Il pli cool è stà da bajegiar ils radios.
Gievgia, ils 24 da november
Al di da la premiera devi bain anc da finir contribuziuns e da registrar las moderaziuns da l'emissiun – la gronda part da las scolaras e dals scolars eran dentant occupads cun lavurs da preparaziun: Metter da la vart il material che na vegn betg pli duvrà, plazzar las sutgas per il public e betg d'emblidar las pettas ed autras mangiativas per questa saira.
Uschia para tut dad esser sin buna via. Nus ans legrain sin vossa visita durant la premiera en la scola da Lantsch!
