Davent da definir ils temas sur la producziun da las contribuziuns enfin tar registrar las moderaziuns vegn l’entira emissiun dal proxim Minisguard producida dal tuttafatg a Segl en scola ensemen cun las scolaras ed ils scolars. Per la redacziun munta quai far las valischs cun cameras e plazzas da tagl.
Gievgia – il grond finale
Questa saira a las 17:30 vegnan las moderaziuns per il Minisguard registradas. Quai grond mument è il medem mument era ina festa per ils da Segl. Ma enfin lura èsi anc da finir intginas chaussas ed il team tecnic sto emprender d’enconuscher las grondas cameras.
Mesemna – il di creativ
Mintga di vegnan pli e pli bleras contribuziuns finidas. Bainprest è tut pront per l’emissiun. Exact il dretg mument a Segl per cumenzar a scriver moderaziuns. Co quai capita è era da vesair sin Instagram.
Mardi – oz è vegnì producì
Durant il segund di è gia l’emprima contribuziun vegnida a fin. Las scolaras ed ils scolars han silsuenter lavurà vinavant per che tut las istorgias sajan prontas per la registraziun da l’emissiun la gievgia saira a Segl.
Mo noss redacturs giuvens n'han betg be lavurà per la televisiun. Els han fotografà e filmà tut a dubel per Instagram e Facebook da RTR. Tge che noss teams han fatg l'entir di pon ins vesair sin Instagram ubain en la galaria da fotos.
Glindesdi – da bell’entschatta vai per tut
Sin palpiri èn tut las contribuziuns gia preparadas. Per ils scolars da Segl vali dentant oz d’emprender d’enconuscher tut la tecnica per savair realisar lur ideas. Vinavant surpiglian els noss account da instagram e mussan tge che capita davos las culissas a Segl.
MSG 17:40