1. Per tge vai en la seria?
En il center stat la famiglia Durisch, proprietaria e gestiunaria da la pli gronda chasa da medias dal Grischun. Cur chi'il patrun e fundatur Gion-Peder (Elmar Deflorin) mora, rumpa ora in cumbat da pussanza en la famiglia. Gion-Peder ha patratgà vi da sia biadia Ladina (Annina Hunziker) en ses testament. Ladina è in'activista engaschada e s'engascha vehementamain per ils dretgs d'animals e per la protecziun dal clima. Temas che chattan resistenza en la chasa da medias tradiziunala. Precis ella duess però manar l'ultima gasetta rumantscha «Posta». Ma bainprest sa chatta ella en ina palì plain intrigas e cumbats da pussanza.
2. Vegn discurrì be rumantsch en la seria «L'ultim Rumantsch»?
Betg exclusivamain. La seria reflectescha la realitad da bleras Rumantschas e Rumantschs – gist er en la diaspora che sa movan mintga di tranter differents munds linguistics. Sper ils differents idioms rumantschs, inclusiv las differentas colurs ed atgnadads, vegn discurrì en la seria tudestg. «L'ultim Rumantsch» vegn mussà cun suttitels tudestgs.
3. I para che l'istorgia davart la famiglia d'editurs Durisch fiss inspirada da la famiglia da Somedia Lebrument. È quai vair?
En il mument dal svilup n'eran ni la famiglia Lebrument ni la Somedia il tema. Che la seria sumeglia l'istorgia da la famiglia Lebrument, ha da far cun la realitad en la societad. In sguard en autras chasas da medias mussa, ch'i ha savens dà in um ch'ha manà ina chasa da medias ed bajegià si ella. Perquai che nus vulain raquintar in'istorgia autentica, s'orientain nus vi da quellas realitads.
4. Nua è quella seria vegnida filmada?
Las lavurs da filmar la seria dad RTR «L'ultim Rumantsch» han gì lieu en la chapitala grischuna a Cuira e conturn, en la Val Müstair ed a Turitg.
5. Tgi èn las acturas ed ils acturs da la seria?
Las rollas principalas en la seria surpiglian Annina Hunziker sco Ladina e Marietta Jemmi sco mamma Andrietta Cadonau. Marco Luca Castelli gioga Gion Durisch e Noam Jenal il schefredactur da la «Posta» Corsin. En ulteriuras rollas vesa ins Elmar Deflorin sco Gion-Peder Durisch, Annina Sedlacek sco Gianna, Roman Weishaupt sco Caprez, Gina Estrada sco Thelma, Tim Theus sco Xeno, Josef Willi sco Danuser, Ursin Derungs sco Franz, Oceana Galmarini sco Maria, Esther Berther sco Silvia, Sandro Derungs sco Cla, Cyrill Birchler sco Tenzin, Fiona Rae Brunner sco Ronja, Leonie Bandli sco Christina, Ivo Orlik sco giuven collavuratur da la recepziun, Jon Linard Cadonau sco Gaudenz, Claudia Bläsi sco Elisabeth, Fabian «Bane» Florin sco Tscharner e Nikolaus Schmid sco Jenni.
6. Tgi ha producì «L'ultim Rumantsch»?
La seria da tschintg parts è vegnida producida da Sophie Toth da Shining Film da Turitg. Manuel Sieber ed Anne Sommer da schau.GmbH èn stads partenaris da contact al lieu. Reschia ha Adrian Perez manà cun la camera dad Aaron Markus Graf. Ils scenaris èn vegnids sviluppads en il Writer's Room dals auturs Adrian Perez, Jen Ries e Simon Nagel.
7. Pertge producescha Radiotelevisiun Svizra Rumantscha (RTR) ina seria fictiva?
Films e serias èn observaturs impurtants da la societad. L'incumbensa dal film è da raquintar istorgias, da svegliar emoziuns e da guardar il mund or da novas perspectivas. In bun film po reflectar la societad, svegliar dumondas e provocar da reflectar davart l'atgna vita e davart il mund.