Julie Fox sa senta da chasa en l’entira Svizra. Oriunda è la giuvna chantadura dal Tessin, abitescha dapi plirs onns en il Grischun e sia EP da debut ha ella registrà cun in producent da Losanna. Uschia n’èsi era betg ina surpraisa ch’ella ha in dun per linguas e scriva sias chanzun per englais, tudestg svizzer, franzos ed en sia lingua materna talian. Quai pachetescha ella en melodias da folk ed americana. La cumbinaziun da quellas influenzas e tematicas è l’EP da debut «Homeward Bound» – tge che munta ton sco «sin via a chasa». Tematicamain sa movan las tschintg chanzuns enturn il far viadi, la libertad, patria e la natira. Quai è era palpabel en las melodias che dattan in sentiment d’esser da viadi ed in zic in’atmosfera sco enturn in fieu da champ.
Da dis lungs fin fluras
Da las tschintg chanzuns da la EP èn quatter per englais ed ina per tudestg svizzer. Quai saja stà ina decisiun natirala – Quai giaja meglier a prà cun ses stil da musica e saja era pli chapibel per persunas en tuttas regiuns Svizras e tut tenor era sur ils cunfins ora.
Cun scriver questas chanzuns hai jau m'accurschì che tuttas tractan la patria – contemplà da differentas perspectivas, perquai era il titel «Homeward Bound» – En viadi a chasa.
Il viadi tras «Homeward Bound» cumenza cun la chanzun «Long Days». Igl è in start plain energia che dat schlantsch per l’entschatta da la via e che cuntegn gia ina da las spezialitads da Julie Fox: il banjo, in instrument plitost nunusità. Cun «Pilgrim» han ins chattà il ritmus ed auda ils utschels sper via. «Wolfskind» è lura pli pensiv e ruassaivel e derasa in’atmosfera misteriusa. Quella resuna lura era en il toc pli viv «Fly High». La finiziun fa lura «Flower» – la single actuala. Cun ella cumplettescha Julie Fox ses debut fitg equilibrà e cumplet. Igl è in disc ch’envida da siemiar, ideal per ir sin viadi ubain giudair in’excursiun en la natira.
Igl è stà in lung viadi da l’emprima chanzun fin a la publicaziun. Ma cun glimar bun in onn a mez èsi gartegià a la chantadura da crear ina EP che dat en egl en la scena musicala grischuna actuala.
Per la publicaziun da sia EP da debut ha Julie Fox tschernì in zic in’autra varianta. I na vegn betg a dar in disc, in platta ubain ina cassetta – la musica resta disponibla be digital. Per tuttina tegnair enta maun insatge ha ella laschà squitschar in cudeschet cun tut ils texts. Tiers ha la scriptura engiadinaisa Romana Ganzoni e la musicista Carole Brunner da Winterthur da la gruppa «Ginger and the Alchemists» agiuntà lur patratgs en furma da poesias tar mintga chanzun. Pia in debut che prenda musicalmain e publicisticamain in zic autras vias.
