Kontra K
Cun bun 4,8 milliuns portatuns vendids è il rapper «Kontra K» in dals etablids da la Germania. El ha cumenzà sia carriera en il duo da rap «Vollkontakt» ch’è dentant ì dapart be dus onns pli tard. Ses album da debut sco artist da solo ha el publitgà il 2012 – emprims success ha el dentant pir gì suenter pliras publicaziuns cun ses quart album «Aus dem Schatten ins Licht». Cun quel è el per l’emprima giada sa tschentà sin il podest da la parada da hits tudestga.
Alle Farben
Sco emprim in rapper da Berlin e sco proxim in DJ: «Alle Farben» alias Frans Zimmer. Ses emprim hit ha el gì avant bun 10 onns cun «She Moves (Far Away)». Cun quella chanzun ha el cuntanschì en Germania il status da platin (dapli che 300’000 portatuns vendì). 2018 ha el collavurà cun la Svizra Stefanie Heinzmann e ses hit «Build a House» – da quella datti dal reminent era in versiun (per part) rumantscha.
Tones and I
Il hit da stad 2019 «Dance Monkey» han segir anc blers en l’ureglia. Cun quel ha la giuvna chantadura da l’Australia Tones and I fatg il pass en las paradas da hits sin l’entir mund. Dapi lura ha ella publitgà in album ed ina EP ed è stada sin turnea enturn il mund. Sia single actuala «The Greatest» era la chanzun uffiziala da las “Matildas” l’equipa naziunala da ballape da dunnas.
01099
Il segund act da rap tudestg per il festival a Degen. 01099 (pronunzià Null-Zehn-Neunundneunzig) derivan da Dresden e fan dapi 2018 ensemen musica. Ils commembers Gustav, Zachi, Paul e Dani enconuschan per part gia dapi la sablunera. Lur num in pau scurril deriva dal numer postal da la citad Neustadt-Dresden. Emprims hits dad els èn «Frisch» ubain «Durstlöscher». Qua pon ins emprender d'enconuscher la gruppa tar ina scuntrada cun ils moderaturs da SRF Bounce.
Swiss und die Andern
Auter che quai ch’il num lai spetgar n’è quai betg ina gruppa Svizra mabain ina band da punk da la Germania. Il chantadur da la gruppa sa numna Swiss perquai ch’el ha ragischs en Svizra.
EAZ
EAZ è in rapper svizzer cun ragischs cosovaras. Arber Rama, sco che EAZ ha num civil, è da Wetzikon ed ha publitgà l’onn 2015 sia emprima EP. Tar la chanzun «MakeSome Money» dal rapper american SnoopDogg è EAZ d’udir.
Querbeat
Cun els vegn la tribuna pulit plaina: Querbeat da Bonn sa cumpona da 13 persunas ed è ina band che fa “Brass Pop” – Musica da sturs cumbinada cun musica da pop. Dapi 2022 organiseschan els lur agen pitschen festival a Bonn cul num “Randale & Freunde Festival”.
Stubete Gäng
Musica populara moderna u musica da pop cun instruments da la musica populara? I n’è betg uschè simpel da descriver il stil da la gruppa svizra Stubete Gäng.Ils musicists da Hagendornen il chantun Zug numnan lur stil «Örbn Ländler» – saut popular da la citad...
Valentino Vivace
Il giuven tessinais Valentino Vivace è creschì si sin in bain da vignas, ha studegià musica a Losanna ed abitescha uss a Turitg. Uschè maschadà sco ses domicils è era ses stil da musica. Ina maschaida da italo-disco cun pop electronic che fa endament vacanzas da stad, in cornet e la splagia.
DANA
La chantadura Dana da Bienna ha 26 onns ed ha gia baud sa decis da metter tut sin la carta musica. Gidaivel era qua segir ch’ella è creschida si en in dachasa musical cun tut quai ch’ina chantadura dovra. Sper sia carriera da solo chanta ella sco Backing-chantadura e dat lecziuns da chant.
Gigi
Pir dapi paucs onns è la rappadra Gigi activa en la scena dal Hip Hop svizra. En quai temp ha ella dentant gia gì grond success ed empermetta bler per il futur. Il 2023 è ella tranter auter stada sin tribuna dal Big Air Cuira sco era en nossa LateLounge Hip Hop.
Seraina Telli
La finiziun da l’emprima transcha dal Line Up 2024 da l’OpenAir Lumnezia fa la rockadura Seraina Telli. La chantadura da l’Argovia ha cun sia emprima band Burning Witches gia fatg turneas tras l’Europa ed è dapi 2019 solo da viadi.
Faithless Live
Maxi Jazz, Sister Bliss e Rollo èn respectiv èn stads ils chaus davos la band Britannica Faithless. Tranter 1995 e 2011 ha la band fatg ensemen musica. Lur ultim album han els publitgà 2020. Lura dentant gia senza il chantadur Maxi Jazz ch’è morts l’onn 2022.
Frank Carter & The Rattlesnakes
La band englaisa da punk rock Frank Carter and the Rattlesnakes han da curt publitgà lur ultim album «Dark Rainbow». Gia il tschintgavel album dapi lur fundaziun il 2015. Tenor il chantadur Frank Carter emplaina la band la largia tranter ils geners indie, punk e rock & roll.
Acts da la «Startrampe»
L’emprim di a l’Open Air Lumnezia s’auda usitadamain ad artistas ed artists svizzers. Quest onn datti plirs acts giuvens. Per exempel era la giuvna chantautura rumantscha ANIKK che ha tranter auter publitgà il 50avel Top Pop Rumantsch «Tgi eis ti?». L’onn 2021 è ella stada en il final dal bandXost – ina concurrenza per acts giuvens da la Svizra orientala. Là han ins era gia pudì tadlar il rapper Rapture Boy ch’aveva gudagnà quella concurrenza il 2020. Dapi lura ha il musicist cun ragischs en l’Africa dal sid gia publitgà pliras singles ed ina EP. Anavant vai cun acts scuverts al bandXost: La gruppa Crown da Gonten en il chantun Appenzell Dadens han cumenzà cun covers e fan musica che regorda vid ils onns 60 e 70. Il 2023 han els daventads segunds be davos l’ultim act Paul Palud. Il chantadur è medemamain dal Appenzell dentant Dadora. El ha ragischs a Berlin e fa musica ruassaivla per tudestg da scrittira. Sco ultim sa preschentan las “vulps veglias” da quai di: Okto Vulgaris da Cuira. Els stattan per rock plain energia cun la vusch caracteristica da la chantadura Sarah Mark.
