Sche persunas che vivan en Svizra crodan en ina situaziun finanziala d'urgenza, pon ellas sa drizzar a l'agid social. Quel garantescha in minimum d'existenza social sche l'agen salari ed auters agids finanzials na tanschan betg u na stattan betg a disposiziun ad uras. L'onn 2021 ha l'agid social sustegnì 2'538 persunas en il chantun Grischun. Quai èn 1,3% da la populaziun chantunala. Questa quota è ina da las pli bassas en Svizra. Per l'onn 2021 importa la media naziunala 3,1%.
In martgà da lavur ch'è sa revegnì e paucas novas entradas en l'agid social
Malgrà las consequenzas rigurusas da la pandemia da corona n'è la quota d'agid social betg s'augmentada l'onn 2021. Intginas da las mesiras che la Confederaziun ha prendì per mitigiar las perditas finanzialas èn vegnidas cuntinuadas. A medem temp è sa revegnì il martgà da lavur e la quota da dischoccupaziun dal Grischun è sa sbassada sin 1,4% per la fin dal 2021. L'agid social ha registrà cleramain pli paucas novas entradas ch'ils onns avant. L'onn 2021 èn vegnids averts 467 dossiers novs, il 2020 èn quai stads 590 dossiers ed il 2019 518 dossiers.
Deliberaziun or da l'agid social pervia d'ina meglra situaziun da gudogn
Pervia da la situaziun difficila sin il martgà da lavur durant l'onn da pandemia 2020 avevan damain persunas pudì far il pass or da l'agid social. L'onn 2021 è però in meglierament da la situaziun da gudogn puspè stà il motiv principal per ina deliberaziun or da l'agid social: 197 persunas (36%) han pudì sortir da l'agid social pervia da la meglra situaziun da gudogn. Tut en tut 560 dossiers han pudì vegnir serrads. Quai correspunda a stgars in terz da tut ils dossiers manads.
Cler augment dal dumber da las asilantas ed ils asilants che han retratg agid social
Fugitivas e fugitivs cun asil vegnan sustegnids finanzialmain da la Confederaziun durant ils emprims tschintg onns a partir da l'inoltraziun da la dumonda d'asil. Tar las persunas e las fugitivas ed ils fugitivs ch'èn admess provisoricamain dura il sustegn tras la Confederaziun set onns a partir da l'entrada en Svizra. Suenter ston ellas ed els vegnir sustegnids tras il chantun cun agid social economic.
L'onn 2015 èn las dumondas d'asil en Svizra s'augmentadas andetgamain pervia dals conflicts cuntinuants en la Siria, en l'Afganistan ed en l'Irac. Cun in retard sa mussa quest augment er en l'agid social. Il dumber d'asilantas e d'asilants che han retratg agid social è s'augmentà l'onn 2021 per 86 persunas sin 542, cumpareglià cun la perioda da l'onn precedent. Cunquai è s'augmentada er la quota da las asilantas e dals asilants che han retratg agid social da 17,6% (2020) a 21,4% (2021) en relaziun cun il total da las persunas che han retratg agid social.
Gruppas socialas ch'èn il pli fitg periclitadas da depender da l'agid social
Las gruppas socialas ch'èn il pli fitg periclitadas da depender da l'agid social na sa midan strusch. Sco emprim èn ils uffants ed ils giuvenils pertutgads bler pli fitg da l'agid social che tut las autras gruppas da vegliadetgna. En la categoria da vegliadetgna da 0 fin 17 onns importa la ristga da depender da l'agid social 2,7%. En questa gruppa da vegliadetgna è la quota d'agid social pia stada il 2021 pli che duas giadas uschè gronda sco la media chantunala. Quai è d'attribuir al fatg, che chasadas da famiglias èn pli savens dependentas dal sustegn tras l'agid social che chasadas senza uffants.
Sco segund èn famiglias d'in genitur cun uffants periclitadas bler pli fitg che tut ils auters tips da chasadas. Tar chasadas d'in genitur era la quota d'agid social 13%.
Sco terz augmenta er in nivel da scolaziun bass signifitgantamain la ristga da depender da l'agid social. Persunas senza furmaziun professiunala èn fermamain surrepreschentadas en l'agid social. En il chantun Grischun n'han 14,2% da la populaziun da 25 fin 64 onns nagina furmaziun professiunala. La quota da questa gruppa da persunas che ha retratg agid social ha importà 50,3% l'onn 2021.
