Tenor Massimo Gonella dal Touring Club Svizra (TCS) è la dumonda er quest onn fitg auta – sumegliant auta sco l'onn passà. Il mument sajan ils pli blers campadis 90-100% occupads. Cifras concretas na possian ins il mument dentant anc betg communitgar. Il TCS surveglia en Svizra 26 campadis ed en il Grischun 6 (Trun, Mustér, Samedan, Scuol, San Murezzan ed in Glamping a Laax).
Dentant er las societads aviaticas han quest onn nudà bunas cifras. Uschia ha per exempel la Swiss nudà per l'emprim mez onn in dals megliers resultats en sia istorgia. Ils campadis han sentì quai dentant betg sentì uschè fitg. Il sulet saja la repartiziun dals giasts. Quels onn haja in zic pli pauc giasts or da la Svizra ch'ils dus onns passads. Dentant sajan dapli giasts or da l'exteriur vegnì vitiers.
Novs projects
La dumonda è pia gronda, perquai ha il TCS gia plirs novs projects en planisaziun ed è en contact cun las autoritads. Uschia vulan ins per exempel engrondir il campadi a Flem ed er en il Tessin datti trais projects.
Pervia da quest boom avevan er gia ils chantuns e las vischnancas prendì mesiras. La regenza grischuna ha per exempel l'entschatta da l'onn lubì dad engrondir il campadi da Gravas a Lai ed a Tavau han ins stgaffì plazs temporars. Quai cunzunt era per evitar il campar salvadi.
In sguard enavos
Il 2021 han ils campadis svizzers nudà 5,4 milliuns pernottaziuns. Quai ch'ha muntà ad in nov record. Cumpareglià cun l'onn 2019 avant la pandemia è quai stà in plus da 44,1%.
Il 2022 è la cifra anc adina stada auta, dentant cun radund 4,8 milliuns pernottaziuns ida in zic enavos, quai tenor las cifras da l'Uffizi federal da statistica. En tut datti en Svizra bunamain 400 campadis.
