Tgi che dat in sguard en detagl sin la plazza da campar vesa ch'in pitschen univers s'avra. I giogan uffants ed ils creschids giaudan la natira. Ins auda persunas che fan risadas. Dattan quellas troccas? U tge pon ins propi far durant campar?
1. Gieus da chartas
Per bunas vacanzas da campar na dastgan ins betg emblidar las chartas da gieu a chasa. Chau Sep u pli gugent troccas? Ina buna partida po esser in grond plaschair per pitschen e grond.
2. La pli gronda chatscha da stgazi dal mund
L'app «Geocaching» porscha la pli gronda chatscha da stgazi dal mund. Tgi che avra la charta en l’app vesa spert, ch’i dat pli u main dapertut l’in u l’auter stgazi digital da scuvrir.
Ina giada annunzià, po il gieu ir liber. Ins tippa sin ina gluvetta sin la charta e suonda a las coordinatas mussadas. Tscherts gieus mainan ins direct a la finamira, ma tscherts èn emplenids cun ligns divertents. Senza la soluziun da quests ligns na vegnan ins betg ad eruir las dretgas coordinatas.
Arrivà al lieu chattan ins lura ina pitschna boxa cun en in cudeschet da scriver en ils nums. Gugent hai anc en in u l’auter chichergnim ch’ins dastga barattar ora cun in nov object.
3. Spassegiar? Bingo!
Sa mover fa bain a corp ed olma. Co fissi cun in bingo sin via? Ins dovra be squitschar ora il gieu e prender in rispli e gia po l’aventurà ir libra. Sco tar in classic bingo è la finamira d'avair lingias u schizunt la charta plaina. Igl e da tschertgar baus, tschittas, auals e pumera. Cun quai bingo è spassegiar segir mai pli lungurus.
Per il download
4. Colurar cunter la plievgia
Sche l’aura è grischa ed ins sto star sut tetg è colurar ina bun’idea. RTR ha ils perfetgs maletgs per squitschar or a chasa e prender sin plazza da campar. Per ils downloads per plaschair cliccar qua.
Colurar po far plaschair ad ils uffants, ma ditg serius, pertge betg prender sco persuna creschida ina colur enta maun e laschar far l’aura. Avair plaschair vi dal pitschen fa cuntent.
5. Leger in cudesch
Nus tuts avain in u l'auter cudesch sin curuna, che mo spetga da vegnir legì. Uss fiss il temp per prender quel en la valischa e dar ad el ina schanza. In bun roman, in cudesch d'emprender linguas u in cudesch tematic pon esser in salvavita tar dis lungs plain plievgia.
Per tgi che na po betg leger, quel po relaxar tar in bun cuntegn da video or da la videoteca dad RTR.
