Ina da las finamiras principalas e da derasar e finalmain er installar Ice Stupas en tut las regiuns ch’èn adattadas. Uschè hajan ils responsabels enturn il glaziolog Felix Keller er gia gì contact cun differenta glieud pervi da lur Stupas da glatsch.
Gidar e sensibilisar
Cun la fundaziun da la nova societad Ice Stupa International han ils preschents er definì projects concrets ch’ins vuless realisar quest onn. Dad ina vart è quai ina collavuraziun cun il pajais da Ladakh. In gruppa da Svizzers ha planisà dad ir en quel pajais a gidar a construir ina nov’universitad per alternativas, ha declerà Felix Keller.
Ice Stupa Village
Ultra da quai è previs da realisar novas Stupas da glatsch en Engiadina. Sche pussaivel puspè en la Val Roseg e tut tenor gist in entir cumin. Cun pitschens models vul la societad sensibilisar la glieud per la problematica dal midament da clima e sias consequenzas.
Stupa per Chamona Lischana?
Emprims contacts hajan els er gia gì cun responsabels da la Chamona Lischana. Il provediment d’aua da quella è periclità causa ch’il glatscher daventa adina pli pitschen. Ina realisaziun d’in Ice Stupa vegnia examinada, uschè il glaziolog. Pussaivel fiss dentant er da realisar in reservuar dad aua en furma d’in Stupa sin in prà, che duvrass urgentamain aua da primavaira.
Salvament da vadretg resta finamira
En emprima lingia vul ins dentant cuntinuar cun l’idea da savair salvar in di il vadretg da Morteratsch. Per quai è la societad avisada sin sustegn finanzial. La basa per ir a pitgar porta saja uss dada cun la fundaziun da la Ice Stupa International.
L’idea da conservar aua en furma da glatsch per avair reservas sin il lieu, deriva oriundamain da Ladakh. Entant han ins experimentà l’enviern passà e realisà in Ice Stupa en la Val Roseg.
RR actualitad 12:00
