L'Ems Chemie ha fatg damain svieuta l’emprim quartal – dal schaner fin il mars – da quest onn. Cumpareglià cun la medema perioda da l'onn passà saja quella sa reducida per passa 11% sin 545 milliuns francs. Quai ha communitgà il concern. D’attribuir sajan questas cifras surtut a la luna da consum che saja plitost deprimida en l’Europa e la China, ma er al ferm franc svizzer.
Ems resta tar sia prognosa 2024
Las prognosas per l’entir onn da gestiun na sajan betg sa midadas: uschia quinta l'Ems Chemie vinavant cun ina svieuta en il rom da l’onn passà. Pertutgant il resultat da gestiun quinta l'Ems cun in levamain sur quel da l'onn precedent.
Il 2023 aveva la scheffa da l'Ems prognostitgà che la situaziun economica na vegn betg ad esser meglra en il 2024. Ma il concern emprovia tenor Martullo Blocher da cumpensar questas cundicziuns tant sco pussaivel cun dar gas sin il martgà.
Or da l'achiv:
Er l'onn 2023 – serrà cun passa 10% pli pauc gudogn ch'il 2022 – è stà in onn plitost grev per il concern Ems Chemie. Martullo Blocher ha declarà envers RTR che la conjuctura – pia la situaziun economica – en l'Europa e global haja ensemen cun il ferm franc svizzer creà cundiziuns difficilas. Quellas n'haja il concern betg pudì cumpensar cun innovaziuns.
