Il president da la PPS Stäfa Lukas Bubb ha fatg la proposta che fugitivas e fugitivs che fissan partids tiers a Stäfa duessan ir ad abitar en la Val Müstair. Davent da fanadur sto Stäfa surpigliar 45 fugitivas e fugitivs dapli che usità.
Perquai ch'els n'hajan betg plaz a Stäfa ha Lukas Bubb gì l'idea da cooperar cun la Val Müstair. Stäfa e Val Müstair èn vischnancas partenarias, ch'han gia pliras giadas gidà ad in l'auter. Per exempel haja Stäfa regalà a Val Müstair in auto da pumpiers ed in'ambulanza, scriva il Tagesanzeiger.
La presidenta da Val Müstair Gabriella Binkert Becchetti (PPS) ha ditg envers il Tagesanzeiger ch'ella na sappia betg pigliar a mauns nagut cun quella proposta. Ella haja survegnì questa proposta da Lukas Bubb. Ella saja sa dumandada, sch'ella duai forsa trametter ils lufs en l'iert da Bubb. Quai prenda el cun humor e di, ch'el ha deplorablamain mo in balcun.
Tenor Bubb haja el discutà curt cun Binkert Becchetti, e spetgia da chattar en il futur ina schliazun cun la Val Müstair davart alloschis da fugitivas e fugitivs. Tenor el na cuntentian las opziuns che Stäfa haja betg per alloschis.
