Ils temas da la PPS
- Immigraziun: Cun «l'iniziativa da durabilitad» s'engascha la PPS gia per la terza giada cunter la libra circulaziun da persunas cun l'UE.
- Asil: La PPS pretenda che la politica d'asil vegnia rinforzada massivamain. Per exempel vul ella spustar a l'exteriur las proceduras d'asil.
- «Woke e gender»: La partida sa drizza sistematicamain ad electuras ed electurs che sa grittentan da las discussiuns da «woke» e da gender.
- Neutralitad: la PPS è sco suletta partida dal Cussegl federal cunter schluccadas tar la surdada d'armas e cunter sancziuns da la Russia.
Sutga chauda per Binkert Becchetti
La PPS vul gudagnar dapli electuras ed electurs quest onn cun il tema immigraziun. Ella pretenda in stop tar 10 milliuns abitantas ed abitants. Pertge gist 10 milliuns?
Gabriella Binkert-Bechetti: Nus badain ussa gia cun ina populaziun da nov milliuns ina mancanza d'abitaziuns e terren da fabrica. Nus n'essan betg encunter glieud che vegn a lavurar, ma nus vesain in fitg grond problem cun glieud che vegn qua e na vul u na po betg lavurar. Nus essan persvas ch'ins sto cumbatter la migraziun pli baud e far in pli grond engaschi en ils pajais d'emigraziun.
La PPS è cunter furnir armas e cunter sancziunar la Russia. Co po in pajais cun ina tradiziun umanitara sco la Svizra simplamain guardar e na far nagut?
Gabriella Binkert-Bechetti: La Svizra ha prendì si bleras persunas da l'Ucraina, e quai è tenor la tradiziun da la Svizra noss duair. Las sancziuns cunter la Russia da la Svizra èn pli fermas che quellas d'auters pajais, ed jau pens che la neutralitad è ina basa fundamentala da nossa Svizra. Nus na duessan betg dir ch'i dettia armas sch'i dat guerra. I pudess dar guerra en il Cosovo u en l'Albania, e quai pudess dar in dischequiliber en l'entira Europa. U che nus essan neutrals, u che nus n'essan betg neutrals.
Avant quatter onns ha la PPS perdì il sez da Heinz Brand. Tgi è ferm avunda per puspè ramassar quellas vuschs?
Gabriella Binkert-Bechetti: Sco partida vegni fitg grev. Las ulteriuras partidas han las colliaziuns da glistas, ma nus sco partida cartain che quai è pussibel. Jau persunalmain ves duas persunas ch'han ina gronda schanza, quai è Thomas Roffler ch'è fitg enconuschent tar ils purs, ed il segund è Roman Hug ch'è era schon stà a las elecziuns da la regenza.
- è presidenta communala da Val Müstair
- è en la suprastanza da la Partida populara svizra dal Grischun
- è interprendidra e pura d'agroturissem
- naschida dal 1960
- è naschida a Turitg, abita dapi 30 onns en Val Müstair
E tge pensa la glieud sin via da la PPS?
Nus avain dumandà glieud sin via e politichers e politicras tge ch'els pensan da la PPS. Sin questas dumondas e pretensiuns ha lura Gabriella Binkert Becchetti dà resposta.
ChatGPT descriva la partida
L'intelligenza artificiala ChatGPT ha creà ina poesia sur da la Partida populara svizra. Tge è la reacziun da Binkert Becchetti sin questa ovra critica?
Scenaris fictivs sche la PPS survegniss tut ils sezs en il parlament
En il parlament federal sesan persunas da total 10 partidas. I vegn debattà, fatg dispitta e chattà cumpromiss. Tge fissi dentant, sch'ina partida avess tut ils sezs e pudess decider sulettamain? Co vesess la Svizra or, sch'ina partida realisass in ad in ses programm? Nus avain mess ensemen intgins scenaris fictivs ed in pau stravagads – che tutgan dentant ils puncts centrals dals programs da partida.
La situaziun da partenza
Avant quatter onns n'èn ils temas betg stads favuraivels per la PPS, il clima u las dunnas n'han betg gidà ad ella. Igl ha dà in spustament envers la sanestra (-verda) e perditas per la PPS.
En ils chantuns èsi l'emprim ì vinavant uschia, la partida ha dentant puspè pudì manar enturn il trend, en il mument è la partida en schlantsch. Ils temas immigraziun e neutralitad èn favuraivels.
Tops en la davosa legislatura
- Coup dal clima dal 2021: Sco suletta partida aveva la PPS sa posiziunà cunter la lescha dal clima e gudagnà. Dentant n'ha la partida betg pudì repeter quai tar la lescha da protecziun dal clima il 2023.
- Spiert dal temp: La PPS ha in sensori per tge che fatschenta la populaziun, sco per exempel temas sco «woke» e gender che disturba tenor il barometer d'elecziuns da la SRG blera glieud.
- Cussegl dals chantuns: Ditg èn las elecziuns per il Cussegl dals chantuns cun il sistem da maiorz stadas grevas per la PPS, tar las elecziuns d'Esther Friedli 2023 ha ella pudì midar quai. Quai ch'è in bun segn per l'atun 2023.
Flops en la davosa legislatura
- Opposiziun cunter la pandemia: La PPS ha opponì massivamain a la politica da corona dal Cussegl federal, ha dentant pers trais giadas tar votaziuns (lescha da Covid).
- PPS cunter ils citadins: La campagna cunter las citads «sanestras» e «verdas» n'ha betg funcziunà, ed il president da quella Marco Chiesa n'ha betg adina fatg ina parita credibla.
- Populaziun vul libra circulaziun da persunas: La PPS ha pers il 2020 cun sia iniziativa da limitaziun, quai tar ses tema principal.
La PPS grischuna
La PPS ha in egl sin il sez da Sandra Locher Benguerel (PS), il tradiziunal sez balluccant grischun. Ella na po dentant betg profitar d'ina colliaziun da glistas. In'influenza sin il resultat da la PPS en il Grischun pudess sia opposiziun cunter il plan directiv d'energia avair. Il sez da Magdalena Martullo-Blocher vala sco segir per la partida.
