Siglir tar il cuntegn

Header

video
Sandra Locher Benguerel na candidescha betg pli per il Cussegl naziunal
Or da Telesguard dals 12.01.2023.
laschar ir. Durada: 2 minutas 23 Secundas.
cuntegn

Elecziuns naziunalas atun 2023 Sandra Locher Benguerel na candidescha betg in'ulteriura giada

La cussegliera naziunala socialdemocrata vul suenter 16 onns cun diversas activitads politicas sa concentrar sin sia lavur sco scolasta e sco commembra da la direcziun da l'uniun tetgala da la magistraglia.

La plazza en la direcziun da l'uniun naziunala da la magistraglia ha ella cumenzà l'avust passà. Là possia ella cuntinuar cun la lavur ch'ella haja cumenzà sco presidenta da l'uniun da la magistraglia grischuna e s'engaschar per la furmaziun en Svizra, scriva Sandra Locher Benguerel en ina communicaziun. E malgrà ch'ella saja gugent cussegliera naziunala per il Grischun e defendia il sistem da milissa svizzer cun lavurar dasper uffizis en politica ed uniuns, na possia ella betg far tut parallel sur in pli lung temp.

audio
Sandra Locher Benguerel na candidescha betg in'ulteriura giada
ord Actualitad dals 12.01.2023. Maletg: RTR, Elias Tsoutsaios
laschar ir. Durada: 3 minutas 49 Secundas.
Tuts ch'enconuschan mai san che la politica n'è betg mi'ultima prioritad. Che l'uffizi è in grond, da quai era jau conscienta.
Autur: Sandra Locher Benguerel Cussgliera naziunala, PS

Nova fasa da la vita suenter 16 onns en la politica

Uschia è la dunna da 47 onns sa decidida da sa focussar suenter 16 onns cun diversas activitads politicas, sin ses interess da coc en la furmaziun e da s'egaschar per uffants e giuvenils. La decisiuns saja stada tut auter che simpla, ma engaschament politic muntia er blera preschientscha las sairas e las fins d'emna. Per proteger sa sezza, saja stà da metter prioritads e sa focussar uschia ch'i restia era temp per sa recrear e reflectar tranter tut ils uffizis.

Sandra Locher Benguerel

Avrir la box Serrar la box
Sandra Locher Benguerel
Legenda: Keystone

La dunna da 47 onns è creschida si en la vischnanca Lüterkofen-Ichertswil en il chantun da Solothurn. Sia carriera ha cumenzà sco scolasta primara l'onn 1996 a Bettlach en il chantun da Solothurn nua ch'ella ha dà 4 onns scola. Suenter in viadi enturn il mund è ella sa decidida da vegnir a Cuira a star ed ha maridà ses um Philippe Benguerel. Sa chasada en il Grischun ha ella puspè cuntinuà a lavurar sco scolasta a Weesen, en il chantun Son Gagl, a Scanvetg ed en la Scola Bilingua a Cuira.

Via politica:

Per la politica è Locher Benguerel gia adina s'interessada ed en la vegliadetgna da 30 onns è ella sa decidida d'entrar en la partida socialdemocratica. La dunna da 47 onns ha lura sin dumonda candidà per in sez sco suppleanta en il Cussegl grond. Dapi il 2006 ha ella lura gì in sez fix. Il 2010 è ella lura vegnida elegida uffizialmain sco deputada en il Cussegl grond ed ils 20 d'october 2019 è ella vegnida elegida en il Cussegl naziunal.

Tuttina defender omadus sezs en il Cussegl naziunal

Il vicepresident da la PS svizra, Jon Pult, candidescha però per ina ulteriura perioda d'uffizi. Quai ha el annunzià gievgia ad ina conferenza da pressa da la partida grischuna. Els deploreschian la decisiun da Sandra Locher Benguerel, ma i saja chapaivel, uschia il president da la PS grischuna, Andri Perl. Tenor el n'è quai però nagina raschun da betg defender il segund sez en il Cussegl naziunal. Tut en tut saja la partida numnadamain en ina megliera situaziun da partenza per il cumbat electoral che anc il 2019. Perl numna qua il fatg d'avair questa giada cun Pult gia in cusseglier en uffizi sco er ils success dals davos onns en il Cussegl grond e sin nivel communal. La partida sa stentia plinavant per ina ulteriura colliaziun da glistas cun ils verd-liberals e la Verda Grischun.

Nus essan persvas che nus pudain metter ensemen ina glista equilibrada tge che pertutga las regiuns sco era cun candidaturas fermas da dunnas.
Autur: Andri Perl president PS grischuna

Persunas interessadas da candidar ensemen cun Jon Pult per il Cussegl naziunal, pon s'annunziar a partir dad uss. La glista vegn la partida a nominar a chaschun dal di da partida, ils 15 d'avrigl 2023. Era candidaturas per il Cussegl dals chantuns na sajan betg exclusas, la prioritad actuala saja però da defender ils sezs en il Cussegl naziunal.

Noss correspundent en la chasa federala Adrian Camartin ha valità questa decisiun

A Berna è questa decisiun stada ina surpraisa ch'ella na vegn betg pli a candidar. Cura ch'ella aveva cumenzà sco cussegliera naziunala è ella sa vivida en spert. Sia partida aveva tramess ella en la cumissiun per scienzia, furmaziun e cultura, nua ch'ella ha pudì sa profilar fitg svelt, surtut era perquai ch'ella è scolasta ed ha savì da tge ch'ella discurra. Ella aveva plitost lavurà davos las culissas cun far allianzas era sur ils cunfins da la partida.

audio
Valitaziun da noss correspundent da la Chasa federala Adrian Camartin
ord Actualitad dals 12.01.2023. Maletg: RTR
laschar ir. Durada: 5 minutas 13 Secundas.

Or da l'archiv
La gronda surpraisa da l'elecziun da Sandra Locher Benguerel il 2019:

video
La surpraisa – Sandra Locher Benguerel
Or da Telesguard dals 21.10.2019.
laschar ir. Durada: 2 minutas 52 Secundas.

RTR novitads 10:00

Artitgels legids il pli savens

Scrollar a sanestra Scrollar a dretga