Siglir tar il cuntegn

Header

audio
Quai ans spetga durant las elecziuns naziunalas 2023
Or da Actualitad dals 04.01.2023. Maletg: RTR
laschar ir. Durada: 4 minutas 57 Secundas.
cuntegn

Elecziuns dal parlament Il carussel gira be plaun

L’onn 2023 è in onn d’elecziuns. Il suveran svizzer elegia tgi che dastga seser en il cussegl naziunal e tgi en il Cussegl dals chantuns. Tge fatschas grischunas rian pia quest onn da placats durant il cumbat electoral? L'ultim pled ha il suveran, las elecziuns èn ils 22 d'october 2023.

Set politicras e politichers po il Grischun trametter a Berna. Enfin uss gira in carussel cun otg nums. Sper ils nums dals cussegliers e las cusseglieras actualas vegn quel da l'anteriur cusseglier guvernativ Christian Rathgeb numnà.

Christian Rathgeb (PLD)
Legenda: Christian Rathgeb (PLD) L'um da 52 onns veglia bugen politisar là nua ch'ins po avair in'influenza, ha el ditg. Keystone

La finamira da la Partida liberaldemocratica è da betg perder il sez ch'ella ha reconquistà il 2019. Sin quest sez sesa atgnamain la collega da partida Anna Giacometti.

Anna Giacometti (PLD)
Legenda: Anna Giacometti (PLD) La liberaldemocrata che politisescha n'ha anc betg annunzià sche ella candidescha u betg. Keystone

Tuttina ditg sco Anna Giacometti politiseschan er Sandra Locher Benguerel e Jon Pult da la Partida socialdemocratica a Berna. Sco Locher Benguerel ha confermà annunzia la PS Grischun il decurs dal schaner co la partida sa posiziuneschia en vista a las elecziuns.

Sandra Locher Benguerel (PS)
Legenda: Sandra Locher Benguerel (PS) Per ella saja ina gronda onur e responsabladad dad astgar politisar a Berna. Keystone

I fiss ina surpraisa sche betg tant Jon Pult sco er Sandra Locher Benguerel candidassan anc ina giada – er per che la Partida socialdemocratica vegn da tegnair ils dus sezs ch'els han recaltgà tar las ultimas elecziuns dal 2019.

Jon Pult (PS)
Legenda: Jon Pult (PS) Jon Pult vesa quai sumegliant sco sia collega da partida. Er el s'engascha e politisescha gugent en il Cussegl naziunal. Keystone

La politicra da la Partida populara, Magdalena Martullo, ha gia confermà l'atun ch'ella cuntinuass gugent cun sia lavur en il Cussegl naziunal – en l'interess da la partida, dentant er dal Grischun.

Magdalena Martullo (PPS)
Legenda: Magdalena Martullo (PPS) Er or da vista grischuna duai la PPS esser represchentada vinavant en il Cussegl naziunal. Keystone

Ed er Martin Candinas vul s'engaschar vinavant. Il 2023 è el president dal Cussegl naziunal. Durant quel onn veglia el servir al parlament sco president e suenter speria el da puspè dastgar cuntinuar cun sia politica sco «tut normal commember dal cussegl naziunal, speranza en l'ultima retscha», uschia Martin Candinas. Enfin uss n'haja el anc betg reussì tut sias finamiras. El veglia anc muventar insatge ils proxims onns.

Martin Candinas (Allianza dal Center)
Legenda: Martin Candinas (Allianza dal Center) Il 2023 è Candinas president dal Cussegl naziunal e cunquai il pli aut Svizzer. Keystone

Il politicher da l'Allianza dal center Stefan Engler che politisescha en il Cussegl dals chantuns veglia medemamain cuntinuar cun sia lavur, sco retschertgas da Keystone-SDA mussan.

Stefan Engler (Allianza dal center)
Legenda: Stefan Engler (Allianza dal center) Suenter trais legislaturas cuntinuas Stefan Engler gugent en il Cussegl dals chantuns. Keystone

Il segund represchentant grischun en la Chombra pitschna, Martin Schmid, fetschia gugent sia lavur a Berna – il pli gugent ensemen cun Stefan Engler.

Martin Schmid (PLD)
Legenda: Martin Schmid (PLD) Il liberaldemocrat è dapi trais legislaturas a Berna e cuntinuass gugent cun sia lavur. Keystone

Vis sur l’entira Svizra – enfin uss damain demissiuns

Cumpareglià cun las ultimas elecziuns naziunalas, il 2019, vulan sco i para dapliras e daplirs che sesan uss en il parlament a Berna er mantegnair quest sez. Enfin uss han 8 commembers dal Cussegl dals chantuns e radund 20 dal Cussegl naziunal annunzià lur demissiun, sco retschertgas da l’agentura da novitads Keyston-SDA mussan.

En la Chombra pitschna èn quatter da las tschintg fracziuns pertutgadas. Sulettamain nagin da l’Allianza dal center ha – fin uss – annunzià da vulair chalar. En la legislatura currenta ha bunamain la mesa Chombra gronda – 22 da 26 sezs – cumenzà da nov cun l’uffizi.

Main clera è la situaziun – il mument anc – en il cussegl naziunal. Intgins commembers ed intginas commembras n’han anc betg fatg transparent lur intenziun da vulair restar u da chalar. Er la Chombra gronda è dapi las elecziuns dal 2019 pli giuvna. 29 persunas n’avevan betg candidà anc ina giada ed a 31 ulteriuras persunas n’era la reelecziun betg reussida.

RTR actualitad

Artitgels legids il pli savens

Scrollar a sanestra Scrollar a dretga