Siglir tar il cuntegn

Header

audio
Per tadlar: quai vala da nov 2023
Or da Actualitad dals 03.01.2023.
laschar ir. Durada: 2 minutas 34 Secundas.
cuntegn

Velo, AVS, ierta Las novas leschas dal 2023

Ir cun velo duai vegnir pli simpel, persuenter vegnan las reglas per sgular ina drona pli severas, ed insaquantas novas leschas che van il 2023 en vigur han er in'influenza sin nossa bursa.

  • La lescha d'ierta vegn pli moderna. Persunas che han scrit in testament vegnan pli libras da decider tgi che survegn quant, perquai che la part obligatorica da l'ierta sa sminuescha sin la mesadad. La part obligatorica è la part da l'ierta che sto ir a la famiglia.
  • Las rentas da l'AVS e d'invaliditad vegnan auzadas per radund 2,5%. Quai sco reacziun sin il creschament dals pretschs e da las pajas.
  • Da nov pon ins spargnar dapli taglia cun pajar en dapli en la terza pitga. Davent dal 2023 è la summa maximala ch'ins po pajar en la terza pitga tar 7'056 francs.
  • Geniturs che lavuran e laschan tgirar ils uffants sut 14 onns da terzas persunas pon inditgar enfin 25'000 francs a la taglia.
  • La Confederaziun ed ils chantuns han 5 onns peda da planisar ina meglra rait da velo e 15 onns peda da realisar quella. Cun la nova lescha da vias da velos duain conflicts tranter autos, velos e peduns vegnir evitads.
  • I dat ina nova tavla da traffic che mussa in auto nair sin funs alv cun ina cifra. Quai è la tabla per l'uschenumnà «carpooling». Vials ch'èn signalisads cun questa tavla èn exclusivamain per autos cun plirs passagiers. Uschia vul la Confederaziun promover da parter l'auto cun pliras persunas.
  • Far zonas da 30 daventa pli simpel. Da nov ston las autoritads numnadamain betg avair ina expertisa che argumentescha il niz d'ina zona da 30.
  • Tgi che vul sgular cun ina drona che paisa dapli che 250 grams ubain ina cun camera u microfon sto sa registrar e far in curs online.
  • La confederaziun na paja betg pli tests da corona. La cassa da malsauns obligatorica surpiglia mo ils custs, sch'in medi u ina media sminan in cas da corona, ed il resultat dal test avess consequenzas per il tractament.

RTR actualitad

Artitgels legids il pli savens