Passa 10 milliuns francs vul la Confederaziun pajar vid il project per la staziun Cuira vest. Quai è in sisavel dals custs totals da 60 milliuns per la nova staziun. Era auters pli pitschens projects che duain distgargiar il traffic a ed enturn Cuira survegnan sustegn: diversas vias da velo, vias che mainan a Cuira ed infrastructura per il traffic public da las vischnancas enturn Cuira. En tut èn passa 35,5 milliuns francs per la regiun da Cuira.
Cun il program per aglomeraziuns sustegna la Confederaziun ils chantuns e las vischnancas tar la schliaziun da lur problems da traffic. Quai adina cun la finamira da meglierar la rait da traffic, augmentar la segirtad e procurar che l'ambient vegnia distgargià. Per il program da la quarta generaziun è il Cussegl federal sa decidì per 32 projects che muntan investiziuns da total sis milliardas francs e surpiglia da quests radund 1,3 milliardas.
Ils projects sa chattan en tut las parts da la Svizra e tar ils pli gronds tutgan:
- plattafurma da traffic Cuira vest
- midar da bus sin tram a Turitg-Affoltern
- ina ruta sperta per velos en la Val da la Limmat
- pliras mesiras per augmentar la valita e segirtad dal traffic a Bienna
- la electrificaziun dals bus a Basilea
- la prolungaziun da la lingia da tram Nations-Grand-Saconnex a Genevra (sur cunfin)
Per impunder da moda effizienta ils meds ha la Confederaziun evaluà ils 32 projects inoltrads, quant effect ch'els vegnan ad avair – quai tenor ils criteris fixads en la lescha. Ils programs han da meglierar la qualitad dal sistem da traffic, promover il svilup dals abitadis, augmentar la segirtad e reducir la chargia per l'ambient ed il diever da resursas.
La consultaziun dal program per aglomeraziuns actual dura fin ils 9 da settember.
Per meglierar la situaziun dal traffic en las citads ed aglomeraziuns, ed era per armonisar il svilup dal traffic cun il svilup dals abitadis sustegna la Confederaziun dapi radund 15 onns ils chantuns, las citads e vischnancas en il rom dal program per aglomeraziuns.
Dapi il 2008 ha il parlament concedì en tut radund 7,18 milliardas francs per tals projects per l'infrastructura dal traffic.