In schaner cumpara il nov film dal reschissur Damien Chazelle che ha era fatg reschia tar il film La La Land. Il film ha num Babylon e gioga avant 100 onns a Hollywood. Da quest temp datti gist la midada dal film mit sin il film sonor e betg tuts pon far il sigl sin il nov medium. En las rollas principalas giogan Brad Pitt e Margot Robbie.
Il film TAR è in dals gronds favurits per ils Premi Oscars. Cate Blanchett gioga en il psicodrama da Todd Field la schefdirigenta Lydia Tár che maina sco emprima dunna in grond orchester tudestg. Al punct culminant da sia carriera surpiglian dentant sias obsessiuns ed ella n'ha betg pli la controlla da sia vita.
Suenter il grond success da la seria da televisiun Der Bestatter returna Mike Müller cun ses collegas en in film da kino. Ensemen interrogheschan els in cas nua ch’in directur d’in hotel en Engiadina è mort. La polizia locala suppona ch’i saja stà in accident, però Luc e ses collegas entschaivan cun atgnas retschertgas a via illegala.
Per uffants datti era intgins novs films il 2023, uschia cumpara in nov film real dal classicher Arielle. Era in film da Die drei ??? ed in film real dad Asterix und Obelix vegnan nov en ils kinos.
Il pli grond favurit per ils Premi Oscars è il film The Fabelmans da Steven Spielberg. En il film semibiografic raquinta Spielberg dad in giuven mattet ch'ha il siemi da far sez films. El na survegn betg grond sustegn da sia famiglia, auter che da sia mamma artistica che encurascha el dad ir sia via.
In ulteriur nov film che cumpara il 2023 è Barbie. Tuttenina daventa la pli enconuschenta poppa in dretg uman e viva. Quai na tuna forsa betg uschè spectacular. Sch’ins vesa dentant tgi ch'occuppescha las rollas e tgi ch'è davos la camera po quai midar: Reschia fa Greta Gerwig e Margot Robbie gioga Barbie, Ryan Gosling gioga Ken ed Emma Mackey e Will Ferrell èn era da la partida en autras rollas.
Il 2023 cumparan era intginas cuntinuaziuns da films ch’ins enconuscha. Uschia cumparan Indiana Jones 5, il terz Guardians of the Galaxy, il sisavel film da la seria da horror Scream, il quart chapitel da John Wick ed er il setavel film da Mission Impossible.
