29.09.2025, 16:07 Ura - Aboliziun da la valur da l'atgna locaziun – intginas reacziuns

Quest Gea ha sco consequenza che persunas che possedan ina immobiglia ed abiteschan en questa na ston pajar nagina taglia en futur. En auters pleds: l’imposta sin l’entrada fictiva scroda. Cun questa aboliziun pudessan ils chantuns u las vischnancas en futur introducir ina taglia sin secundas abitaziuns. Tenor Martin Bühler, il minister da finanzas dal Grischun è quai dentant anc betg cler sche il Grischun introducescha ina tala taglia. – Ina vischnanca che ha schon empruvà d'introducir ina tala taglia sin secundas abitaziuns è Puntraschigna. Dentant n'è questa taglia betg vegnida introducida perquai che i ha dà squitsch dals possessurs e da las possessuras da segundas abitaziuns. Cun il Gea actual sin palc naziunal a l’aboliziun da la taglia da la valur da l’atgna locaziun è questa tematica puspè sin maisa. Sche quest Gea è bun na sappia la presidenta communala da Puntraschigna, Nora Saratz Cazin anc betg dir. Quai sa mussia alura suenter las discussiuns che seguan. Tenor ella saja quai cumplitgà da far ina tala taglia. I dettia bleras differentas pussaivladads.