Quest Gea ha sco consequenza che persunas che possedan ina immobiglia ed abiteschan en questa na ston pajar nagina taglia en futur. En auters pleds: l’imposta sin l’entrada fictiva scroda. Cun questa aboliziun pudessan ils chantuns u las vischnancas en futur introducir ina taglia sin secundas abitaziuns. Tenor Martin Bühler, il minister da finanzas dal Grischun è quai dentant anc betg cler sche il Grischun introducescha ina tala taglia.
Quai n'è anc betg decidì. Quai discutain sco emprim en la regenza. E sch’ins vul introducir, alura datti suenter in normal process politic.
Il minister da finanzas dal Grischun, Martin Bühler era encunter l'aboliziun da la taglia sin la valur da l'atgna locaziun. Uss sto el dentant agir tenor il giavisch dal pievel.
Secunda emprova per Puntraschigna
Ina vischnanca che ha schon empruvà d'introducir ina tala taglia sin secundas abitaziuns è Puntraschigna. 58% da las abitaziuns en la vischnanca da l'Engiadin’Ota èn segundas abitaziuns. Dentant n'è questa taglia betg vegnida introducida perquai che i ha dà squitsch dals possessurs e da las possessuras da segundas abitaziuns. Cun il Gea actual sin palc naziunal a l’aboliziun da la taglia da la valur da l’atgna locaziun è questa tematica puspè sin maisa. Sche quest Gea è bun na sappia la presidenta communala da Puntraschigna, Nora Saratz Cazin anc betg dir. Quai sa mussia alura suenter las discussiuns che seguan.
Mia aspectativa e speranza a la regenza è uss, che i dat ina proposta clera d’ina regla chantunala che lascha era spazi a las vischnancas.
Tenor ella saja quai cumplitgà da far ina tala taglia. I dettia bleras differentas pussaivladads. Ins pudess far l’imposta sin tut las immobiglias che na vegnan betg utilisadas sco emprimas abitaziuns. U alura anc far la differenza tar las abitaziuns che vegnan dadas a fit sco abitaziuns da vacanzas. La datti pussaivladads da variar questa imposta sin segundas abitaziuns.
Possessurs pronts da pajar?
Quai che resta è la dumonda, sche possessurs e possessuras da segundas abitaziuns fissan pronts da pajar questa taglia che pudess vegnir introducida. Tenor il manader da l’associaziun grischuna dals possessurs da chasas, Urs Marti fissan els pronts da pajar. L’associaziun era per questa aboliziun e chapescha che las vischnancas dovran ina cumpensaziun da questas entradas che crodan davent. Era ils possessurs e las possessuras sajan tenor Urs Marti pronts da pajar e da dir gea a questa introducziun, sche questa taglia n'è exageradamain auta. Il motiv saja, ch’els sajan conscients ch’els han da pajar insatge a las vischnancas che porschan insatge per ils possessurs e las possessuras da segundas chasas.