Aboliziun da la valur da l'atgna locaziun
Svizra: Conclus federal davart taglias immobigliaras sin abitaziuns secundaras
-
GEA
1'579'303 Vuschs
-
NA
1'156'560 Vuschs
Vuschs dals chantuns
- GEA
- Na
L'aboliziun da la valur da l'atgna locaziun è approvada. Il pli dals chantuns era cuntanschì gia baud il suentermezdi. Quel dovri, perquai ch'il project cumbinà pretenda ina midada da la constituziun. Il project cumpiglia numnadamain era la pussaivladad ch'ils chantuns pon introducir ina taglia speziala sin immobiglias secundaras per cumpensar la perdita da meds finanzials che resulta da l'aboliziun.
Svizra franzosa sto acceptar
Il gea è cler cun 57,7% gea vers 42,3% na - ed uschia bler pli cler che spetgà era en las retschertgas avant la votaziun. E relativ cler sa mussa era ch'il cunfin da gea e na correspunda il cunfin linguistic tudestg-franzos. Ditg na han surtut ils chantuns da la Svizra franzosa: Friburg (50,8%), Basilea-Citad (52,9%), Vad (50,8%), Vallais (60,3%), Neuschatel (61,6%), Giura (61,2%) e Genevra (66,1%).
Declerar pon ins quai tranter auter cun il fatg che la taglia sin la lavur da l'atnga locaziun è en la Svizra franzosa pli bassa. Però era cun ina tscherta tema dals impressaris ch'ils possessurs da chasas investeschan main en sanaziuns, sch'i na pon betg pli deducir quai da las taglias, di il correspundent RTR en chasa Adrian Camartin.
Las campagnas dals aderents – surtut da l'Associaziun dals possessurs da chasas – saja en mintga cas stada gronda e chara, haja però era cuntanschì la glieud surtut en las regiuns ruralas en ils vitgs. Cunzunt las forzas conservativas hajan pudì mobilisar lur aderentas ed aderents dad ir a l'urna – e quai surtut en la Svizra tudestga ed il Grischun, argumentescha GFS Berna. En mintga cas para quest project era dad esser stà pli equilibrà che autras propostas ch'èn gia pli baud vegnidas refusadas.
In gea anc pli cler en il Grischun
Grischun vul abolir valur da l'atgna locaziun
Resultat grischun
En il Grischun è il resultat anc pli cler ch'en Svizra, ed era pli cler che spetgà. Tar ina participaziun da 47,60% ha decis la maioritad da 67,14% dad abolir da valita da l'atgna locaziun - e dar als chantuns la pussaivladad d'introducir ina taglia sin immobiglias secundaras.
Concret din 44'667 persunas gea, e 21'861 din na. Quasi tut las 100 vischnancas grischunas din gea - mo Calanca di cler na (59,42%). Tar las regiuns èsi tuttas 11 che din gea cun tranter 59,37% (Moesa) e 73,04% (Viamala).
Plaschair e deplorar – las reacziuns
I saja stà nairas uras dad abolir la taglia da la valur da l'atgna locaziun che saja ina taglia sin ina valur fictiva. Quai ha ditg il president da l'Associaziun dals possessurs da spazi d'abitar e cusseglier naziunal Gregor Rutz (PPS). Quai saja era in signal impurtant encunter far memia blers daivets.
Malas novitads saja quai per locataris e locatarias. Las perditas da taglia tras l'aboliziun stoppia la finala la publicitad cumpensar, scriva la PS. Blers chantuns hajan gia annunzià d'auzar las taglias. La PS pretenda perquai mesiras per distgargiar ils locataris.
