Ils 28 da settember 2025 decida il pievel svizzer davart ina proposta da midar la Constituziun. I va per crear la basa legala per ina taglia chantunala sin immobiglias secundaras. Questa votaziun è decisiva per ina vasta refurma da la taglia sin la proprietad d’abitar, ch'il parlament ha elavurà. Il Cussegl federal ed il parlament recumondan da dir Gea a la proposta. Ils arguments ha la presidenta da la Confederaziun Karin Keller-Sutter declerà ad ina conferenza da medias.
Duas propostas – ina refurma
Il 20 da december 2024 ha il parlament approvà duas propostas:
- La lescha federala davart il midament da sistem tar la taglia sin la proprietad d’abitar ch'aboliss l'imposiziun da taglias sin l'atgna locaziun (Eigenmietwert) sco er ina gronda part da las deducziuns da taglia en connex cun proprietads d'abitar.
- Il conclus federal che dat als chantuns la pussaivladad da crear ina taglia sin proprietads d'abitar secundaras. Quai pretenda ina midada da la Constituziun ed uschia ina votaziun dal pievel.
Questas duas propostas èn legalmain colliadas: sche la votaziun davart la midada da la Constituziun vegn refusada, na po era la lescha davart il sistem da taglia betg entrar en vigur. Formalmain vegn votà mo davart la midada da la Constituziun – ma cun questa votaziun vegn decidì era davart la fin dal sistem actual da taxaziun da la proprietad d’abitar.
Tge mida cun la refurma?
Oz ston persunas che abitan en lur atgna immobiglia taxar la valur da l'atgna locaziun sco entrada. En il medem mument pon ellas deducir ils tschains d’ipoteca e custs da mantegniment. La nova lescha aboliss questa taxaziun e restrenschess las deducziuns – tant per immobiglias principalas sco secundaras.
La midada en la Constituziun permettess als chantuns dad introducir ina taglia speziala sin immobiglias secundaras che vegnan per gronda part duvradas da possessurs e possessuras (p.ex. abitaziuns da vacanzas). I n'è betg l'introducziun dad ina taglia, mabain i dat sulettamain als chantuns la pussaivladad da crear ina taglia. La midada da la Constituziun è la premissa per che l'entira refurma po ir en vigur. Pia era premissa per stritgar la taglia sin l'atgna valur.
Consequenzas per las possessuras ed ils possessurs
Las consequenzas dependan dal livel dals tschains d’ipoteca:
- Tschains bass: La gronda part da las possessuras ed ils possessurs paja damain taglia. Il pli fitg profiteschan quels ch'han gia pajà enavos ina gronda part da l'ipoteca. Quai èn savens persunas pensiunadas.
- Tschains auts: La gronda part paja dapli taglia, perquai ch'ils tschains d’ipoteca na pon betg pli vegnir deducids. Ina deducziun speziala per emprims cumpraders duai mitigiar quest effect.
Consequenzas per las finanzas publicas
Per consequenza vegnan ils respargns da taglia a chaschunar perditas d’entradas per Confederaziun, chantuns e vischnancas en cas da tschains ipotecars bass. Stimadas vegnan 1,8 milliardas francs pli pauc entradas tar il tschains actual da 1,5%. Tar tschains pli auts (ca. davent da 3%) pudessan las entradas crescher. Las entradas potenzialas da la nova taglia sin immobiglias secundaras n’èn betg resguardadas en questa stimaziun. Cun introducir ina tala taglia pudessan ils chantuns pigliar si las entradas che mancan.
Refurma equilibrada
Il Cussegl federal numna intgins arguments per votar Gea:
- Ord vista dal Cussegl federal haja il parlament elavurà ina refurma equilibrada e consequenta. Cuntrari a las propostas da refurma da fin uss restrenschia questa proposta las reducziuns da taglia sin in minimum.
- Vinavant reduceschia il nov sistem la motivaziun da far daivets. Las novas cundiziuns promovian da bajegiar giu daivets ed uschia vegn stabilisà il sistem da finanzas.
- Il sistem actual chargia cunzunt possessuras ch'han gia pajà enavos per gronda part l'ipoteca. Quai èn tipicamain pensiunads. Quels vegnan stgargiads cun la revisiun.
- Il sistem fiscal vegn simplifitgà. Uschia sa reducescha l'impundiment per pajataglias ed uffizis da taglia.
- La nova lescha porscha a chantuns e vischnancas la pussaivladad d'introducir ina schliaziun individuala en connex cun segundas abitaziuns.
Debatta intensiva en il parlament
La discussiun parlamentara è stada viva. Il Cussegl dals chantuns vuleva abolir la taglia sin la proprietad d’abitar mo per immobiglias principalas, il Cussegl naziunal per tut las immobiglias. Igl ha duvrà ina conferenza d'intermediaziun en la quala il Cussegl naziunal ha pudì sa far valair. Era tar las reglas per deducir ils tschains d’ipoteca ha il Cussegl naziunal insistì sin ina regulaziun pli rigurusa.
Critica è vegnida surtut da represchentantas e represchentants da chantuns turistics, che dubitan che las novas entradas potenzialas da la taglia sin immobiglias secundaras na bastan betg per cumpensar las perditas d'entradas.