Radund trais emnas avant la votaziun avessan 51% da las votantas e dals votants dumandads votà per il conclus federal davart taglias immobigliaras ed uschia per l'aboliziun da la valur da l'atgna locaziun. 45% fissan segir cunter u plitost cunter il conclus federal. Quai resulta da la segunda retschertga da Gfs Berna per incumbensa da la SRG SSR en connex cun la votaziun dals 28 da settember 2025.
Ch'ina proposta da las autoritads perda en il decurs dal cumbat da votaziuns sustegn en la populaziun è plitost l'excepziun. Il davos temp hai dentant adina puspè dà quai – per exempel tar la lescha da CO₂ il 2021.
La segunda retschertga mussia be la situaziun actuala, radund trais emnas avant las votaziuns, senza esser ina prognosa per la votaziun sezza, scriva Gfs Berna en il rapport. La cumparegliaziun da l'emprima e segunda retschertga pussibiliteschia dentant d'analisar trends. Uschia sa mussa in trend vers in Na per l'aboliziun da la valur da l'atgna locaziun.
Proprietarias e proprietaris ston actualmain pajar taglia sin la locaziun fictiva per lur atgna abitaziun u chasa – quai è la valur da l'atgna locaziun. Percunter pon ils tschains da debits ed ils custs per il mantegniment vegnir deducids da las entradas.
L'aboliziun da la valur da l'atgna locaziun è dapi onns in tema en la politica sco era tar proprietarias e proprietaris d'abitaziuns u chasas che sa sentan dischavantagiads.
Il sustegn per la proposta d'abolir la valur sin l'atgna locaziun è sa reducida fitg en il decurs dal cumbat da votaziun. Be 51% avessan acceptà la proposta, quai è ina reducziun da 7% cumpareglià cun l'emprima retschertga – il medem mument è il dumber da las vuschs da Na s'augmentà per 11%.
Persunas dal spectrum politic sanester èn cler encunter la refurma da las taglias immobigliaras che persunas en il center politic u a la dretga. Oravant tut persunas che sustegnan la Partida Verda e la Partida socialdemocratica èn cler encunter, cun radund 70%. Cler persuenter èn las partidas da la dretga ed era las persunas senza partida èn anc persuenter, era sch'igl ha dà la in trend envers in Na.
Las votantas ed ils votants da las partidas PPS, PLD, il Center e Verds èn per gronda part da la medema opiniun sco lur partida mamma – e las vuschs èn s'avischinadas a las parolas da las partidas. La basa dals verdliberals sa posiziunescha pli ferm per il project che la lingia da la partida-mamma.
Cleramain sa mussa il conflict per lung da las relaziuns d'abitar: 62% da las proprietarias e dals proprietaris d'abitaziuns e da chasas sustegnan taglias immobigliaras chantunalas sin abitaziuns secundaras – e cun quai l'aboliziun da la valur da l'atgna locaziun, fertant che be 33% dals locataris e da las locatarias sustegnan ina midada dal sistem.
Era datti pli grondas differenzas regiunalas: La Svizra tudestga di cleramain Gea (58%) entant ch'igl è gulivà en la Svizra taliana cun 47% Gea e 46% Na. En la Svizra franzosa (31% Gea) datti ina clera maioritad encunter la proposta (61% Na).
Ina maioritad vesa sco argument central per esser per la proposta ch'igl è malgist da pajar taglia per «entradas fictivas».
Arguments encunter èn ch'oravant tut persunas ritgas profitassan e la tema ch'ils chantuns turistics na pudessan betg cumpensar la reducziun da taglia.
L'identitad electronica pudess vegnir
Sche la populaziun svizra avess gia decis ils 6 da settember en chaussa da la Lescha federala davart la cumprova electronica da l’identitad fiss quella acceptada. 59% da las persunas dumandadas da Gfs Berna avessan approvà la lescha. Cumpareglià cun l'emprima retschertga n'ha quai dà naginas midadas.
Empustar documents uffizials via in'app sin il smartphone u er avrir in conto da banca – quai duai esser pussaivel cun la carta d'identitad electronica (e-ID). Tenor il text da la lescha è il document d'identitad digital facultativ e per gronda part gratuit.
Cuntrari al project da l'onn 2021 ch'ha fatg naufragi èsi questa giada ina purschida statala.
Il muster da conflict en connex cun la Lescha e-ID è politisà fermamain e collià stretgamain cun dumondas da confidenza instituziunala. Las colliaziuns cun las partidas caracteriseschan il pli fitg las tenutas.
In cler sustegn survegnan las aderentas ed ils aderents da la Partida verdliberala, dal Center, da la PLD e da la PS che stattan per gronda part davos la lescha. Sa reducì è il sustegn tar las persunas senza partida. Là datti ina situaziun da pat.
Cleramain sceptica è percunter la basa da la Partida populara che refusa fermamain il project. Las intenziuns da votar da la basa da la partida sa cunfan pia cun las parolas da las partidas mamma.
Ils aderents da la proposta èn persvas ch'ina schliaziun statala è meglra che sche concerns creassan ina e-ID. Plinavant vegn percepì positiv che l'identificaziun digitala è voluntaria e gratuita.
Persunas scepticas vesan plitost il problem che persunas betg affinas al mund digital hajan alura dischavantatgs tar incumbensas administrativas. Plinavant dettia il risico da maldiever e surveglianza entras il stadi.