La finamira è da stgaffir ina basa legala per ina cumprova electronica statala d’identitad. Cun questa duessan persunas s'identifitgar a moda facila e segira sin via electronica – quai en l’internet, envers administraziuns svizras e per part era envers fatschentas. L'utilisaziun da la e-ID n'è betg prescrit. La Confederaziun na incassescha naginas taxas. La protecziun da la sfera privata e la segirezza da las datas duain vegnir garantidas uschè bain sco pussaivel. La e-ID è impurtanta per che la Svizra possia tegnair pass cun la digitalisaziun.
In'emprima emprova dad introducir ina carta d'identitad electronica ha l’onn 2021 fatg naufragi a l’urna. Bunamain dus terzs avevan quella giada ditg Na. In dals arguments principals era che fatschentas privatas avessan stuì porscher ina soluziun.
Co duai quai funcziunar?
La lescha prevesa che la Confederaziun metta en pe l'infrastructura e dà lura or las cartas d'identitad. Quellas vegnan lura arcunadas decentral sin il handy da mintga persuna. Quai duai funcziunar sur ina applicaziun cun il num «swiyu». Cun questa fotografeschan ins la carta d'identitad e fa in curt video da l'atgna fatscha – sche tut è en urden vegn l'identitad electronica arcunada en questa app sin il telefonin.
Chantuns e vischnancas pon era nizzegiar l'infrastructura, per exempel per permiss dad ir cun auto u auters documents uffizials. Tenor il Departament federal da giustia e polizia duai quai garantir la protecziun da la sfera privata.
Grond consentiment per la lescha – paucs encunter
Ina gronda allianza è per la lescha, quest’opiniun sa tira tras la gronda part da las partidas. L’opiniun è che l'identitad digitala porschia ina soluziun segira, statala ed orientada al futur per la Svizra. Impurtant saja il fatg che questa versiun da la e-ID funcziuna cumplettamain sur la Confederaziun.
Per ina gruppa, tranter auter la Giuvna partida populara Svizra e l’Uniun democratica federala EDU, èn cunter la e-ID. Las datas persunalas da la populaziun possian vegnir duvradas per motivs commerzials. I dat pia dubis davart la protecziun da datas.
