Radund set emnas avant la votaziun avessan 58% da las votantas e dals votants dumandads votà per il Conclus federal davart taglias immobigliaras ed uschia per l'aboliziun da la valur da l'atgna locaziun. 33% fissan segir cunter u plitost cunter il conclus federal. Quai resulta da l'emprima retschertga da Gfs Berna per incumbensa da la SRG SSR en connex cun la votaziun dals 28 da settember 2025.
La retschertga mussia però era che bleras persunas n'èn anc betg s'occupadas en detagl cun il tema, di la politologa Martina Mousson. Bleras persunas èn anc stadas indecisas e bleras persunas han anc be tendenzas e betg in cler Gea u Na. Quai haja er da far cun il fatg che las campagnas han cumenzà relativamain tard perquai che blers èn pir gist returnads da las vacanzas da stad, agiunta la politologa.
Proprietarias e proprietaris ston actualmain pajar taglia sin la locaziun fictiva per lur atgna abitaziun u chasa – quai è la valur da l'atgna locaziun. Percunter pon ils tschains da debits ed ils custs per il mantegniment vegnir deducids da las entradas.
L'aboliziun da la valur da l'atgna locaziun è dapi onns in tema en la politica sco era tar proprietarias e proprietaris d'abitaziuns u chasas che sa sentan dischavantagiads.
Persunas dal spectrum politic sanester sustegnan pli fem la refurma da las taglias immobigliaras che persunas en il center politic u a la dretga. Ils pols d'opiniun èn actualmain la basa dals Verds (42% Gea) e quella da la PLD e las persunas senza partida (68% resp. 69% Na).
Las votantas ed ils votants da las partidas PPS, PLD, il Center e Verds èn per gronda part da la medema opiniun sco lur partida mamma. La basa dals verdliberals sa posiziunescha pli ferm per il project che la lingia da la partida-mamma. La basa da la PS è anc relativamain ferm per la refurma, quai cunter la parola Na da la partida mamma.
Cleramain sa mussa il conflict per lung da las relaziuns d'abitar: 68% da las proprietarias e dals proprietaris d'abitaziuns e da chasas sustegnan taglias immobigliaras chantunalas sin abitaziuns secundaras – e cun quai l'aboliziun da la valur da l'atgna locaziun, fertant che be 40% dals locataris e da las locatarias sustegnan ina midada dal sistem.
Era datti pli grondas differenzas regiunalas: La Svizra tudestga di cleramain Gea (61%) entant ch'igl è en la Svizra franzosa (48% Gea) u en la Svizra taliana (50% Gea) anc pli avert.
La identitad electronica pudess vegnir
Sche la populaziun svizra avess gia decis ils 10 d'avust en chaussa da la Lescha federala davart la cumprova electronica da l’identitad fiss quella acceptada. 60% da las persunas dumandadas da Gfs Berna avessan approvà la lescha. Cumpareglià cun la refurma da taglia d'immobiglias èn las tendenzas qua in zic pli cleras, sco er datti pli paucs indecis.
Empustar documents uffizials via in'app sin il smartphone u er avrir in conto da banca – quai duai esser pussaivel cun la carta d'identitad electronica (e-ID). Tenor il text da la lescha è il document d'identitad digital facultativ e per gronda part gratuit.
Cuntrari al project da l'onn 2021 ch'ha fatg naufragi èsi questa giada ina purschida statala.
Il muster da conflict en connex cun la Lescha e-ID è politisà fermamain e collià stretgamain cun dumondas da confidenza instituziunala. Las colliaziuns cun las partidas caracteriseschan il pli fitg las tenutas.
In cler sustegn survegnan las aderentas ed ils aderents da la Partida verdliberala, dal Center, da la PLD e da la PS che stattan per gronda part davos la lescha. Medemamain simpatiseschan a moda pli reservada la basa da la Verda e persunas senza partida.
Cleramain sceptica è percunter la basa da la Partida populara che refusa fermamain il project. Las intenziuns da votar da la basa da la partida sa cunfan pia cun las parolas ch'eran fin ussa enconuschentas da las partidas mamma.