L'identitad electronica – l'uschenumnada E-ID – saja simpla d'applitgar, voluntaria e gratuita. Cun quests arguments sustegna il Cussegl federal la E-ID en vista a la votaziun ils 28 da settember. Il cusseglier federal Beat Jans ha preschentà ils arguments da la regenza.
Il basegn per ina cumprova d'identitat electronica creschia – per exempel per empustar rauba online – argumentescha il Departament federal da giustia e polizia.
Cun la carta d'identitad digitala pudess ins en il futur s'identifitgar virtualmain – realisar quai duai il stadi. Tenor il Departament federal da giustia e polizia duai quai garantir la protecziun da la sfera privata.
Gronda allianza è per la lescha
La lescha davart l'identitad digitala porschia ina soluziun segira, statala e orientada al futur per la Svizra. Uschia è s'exprimì ina gruppa da parlamentarias e parlamentaris ord tut las partidas. La lescha prevesa numnadamain ina versiun cumplettamain statala – auter che tar la davosa emprova. Plinavant vegnian las datas arcunadas decentral sin ils telefonins. Uschia saja la protecziun da datas garantida.
Ils 28 da settember vuscha la populaziun svizra davart la lescha federala per ina identitad electronica – curt lescha da E-ID. Quella stgaffescha la basa legala per ina carta d'identitad digitala. Tgi che cumpra insatge en in portal online u dumonda online per in document uffizial pudess uschia relativ simpel sa verifitgar.
La lescha prevesa che la Confederaziun metta en pe l'infrastructura e dà lura or las cartas d'identitad. Quellas vegnan lura arcunadas decentral sin il handy da mintga persuna. Chantuns e vischnancas pon era nizzegiar l'infrastructura, per exempel per permiss dad ir cun auto u auters documents uffizials.
La E-ID duai esser voluntaria e gratuita.
Segunda emprova per E-ID
In'emprima emprova dad introducir ina carta d'identitad electronica ha l'onn 2021 fatg naufragi a l'urna. In dals arguments principals era che fatschentas privatas avessan stuì porscher ina soluziun.
In grond avantatg da la carta d'identitad electronica saja ch'ella simplifitgescha tscherts process. Uschia possian ins per exempel dumandar online per documents tar la vischnanca, senza stuair passar speravia persunalmain. Surtut per regiuns ruralas, nua ch'il fanestrigl da la vischnanca n'è betg avert mintga di, saja quai ina schanza.
Comité vesa er avantatgs per persunas impedidas
L'identitad electronica saja publica, simpla e facultativa, ha declerà il comité ch'è per la E-ID ils 19-08 a Berna. Il comité cumpiglia represchentantas e represchentants or da la politica, l'economia e la societad civila. Plinavant dettia la E-ID era dapli pussaivladads a persunas cun impediments da prender part a la vita sociala.
Avant quatter onns è la E-ID vegnida refusada a l'urna. Motiv principal da quest temp èn stads dubis pervia da la protecziun da datas. Intepresas privatas avessan gì l'incumbensa da far quellas ID's electronicas. La Confederaziun avess mo gì ina funcziun da controlla. Quest punct hajan ins uss schlià, di il comité. La nova identitad electronica saja uss cumplettamain en mauns da la Confederaziun.
Pitschna gruppa è cunter
Ils documents electronics porschian tenor ils adversaris la pussaivladad a gronds concerns da tecnica da malduvrar las datas dals pass svizzers per reclama. Las datas persunalas da la populaziun possian pia vegnir duvradas per motivs commerzials. I dat pia dubis vid la protecziun da datas.
Plinavant saja la E-ID in privel per la democrazia. Cun las datas persunalas possian vegnir creads profils e cun quai reclama sistematica. Atras ils algoritmus da medias socialas vegn uschia disturbà il discurs democratic.
Tenor il comité dettia insumma autras variantas per sa verifitgar online. Ella na saja pia betg necessaria.
Votaziun è ils 28 da settember
Las votantas ed ils votants decidan davart la lescha da la E-ID ils 28 da settember.