1. Disdir abunaments betg duvrads
L'abunament il pli char è quel ch'ins paja ma ch'ins na dovra betg. L'emprim tip e pia da survegnir ina survista da tge abunaments ch'ins ha insumma, sa dumandar sch'ins dovra els propi e da lura desdir quels ch'ins na dovra betg.
In tip per survegnir la survista da tut ils abunaments ch'ins paja insumma è da dar in sguard direct sin il quint da la carta da credit. Desdir els n'è suenter normalmain betg in gronda chaussa, quai va direct vi dal telefonin en il Playstore u Appstore u en l'app da mintga purschida.
2. Midar l'abunament
Il segund tip è da reducir ils custs per ils abunaments ch'ins ha. Tar ils pli blers purschiders datti differents abunaments cun differentas purschidas. Netflix custa per exempel tranter 11,90 e 24,90 francs il mais, l'abunament pli bunmarchà na porscha betg uschè buna qualitad e po be vegnir duvrà sin in apparat. Tar auters purschiders datti er versiuns pli bunmartgadas u schizunt gratuitas, quellas han lura dentant reclama. Forsa basta er quest abunament per l'agens basegn, i vala en mintga cas la paina da studegiar sch'i faschess senn da far in abunament pli bunmarchà.
3. Midar purschider
I po er far senn da guardar ina giada tge differents purschiders ch'i dat e tge che quels offran. Forsa fa in servetsch pli bunmartgà il medem servetsch sco il pli char ch'ins ha duvrà fin ussa.
4. Siglir d'in abunament a l'auter
Cun quai ch'ins po disdir quests servetschs sin la fin dal mais fai er senn da testar in pau u schizunt da midar regularmain purschider, quai sa numna «Subscription Hopping». Quai vul dir da siglir d'in abunament a l'auter. In exempel: Durant in mais guard jau ina seria ch'i dat be tar ina plattafurma, lura paj jau be per quella. Il proxim mais less jau dentant guardar ina seria tar in auter purschider. Per spargnar disdesch jau lur il purschider dal mais avant. Jau paj pia be quai che jau dovr gist durant in mais.
5. Parter accounts
In'autra chaussa che blera glieud fa per spargnar custs è da parter ils accounts. Vul dir, che jau paj per exempel per il servetsch da musica ed amis u confamigliars pajan per quel da video e nus partain suenter ils accounts. Tar la gronda part dal purschiders va quai anc. Ma probablamain na funcziuna quai betg pli ditg.
Tar Netflix ston ins gia uss pajar 5,90 francs dapli il mais per parter l'account. Però a la fin dals quints resta quai pli bunmartgà che pajar per dus accounts. L'opziun da parter accounts resta pia in bun tric per spargnar daners.
