Questa nova tecnologia è vegnida sviluppada da l'interpresa lucernaisa «Swisens». Diversas apps sco MeteoSchweiz u Pollen-News fan gia diever da questa tecnologia. Cunquai che questas apps actualiseschan uschia mintg'ura la concentraziun en l'aria èsi per persunas pertutgadas pli simpel da planisar cura e nua ir giuadora.
L'expert da pollens Benoît Crouzy ha detg envers SRF che quai saja ina revoluziun per la mesiraziun da pollen. La Svizra è l'emprim pajais insumma che porscha ina rait naziunala da mesirar pollens en temp real. Dentant saja l'interess per questa tecnologia dad auters pajais fitg grond.
