Questas apps èn ina sort charta geografica per il tschiel. La difficultà cun il tschel è ch'el nè betg be enorm grond e ch'i dat millis e millis da stailas, ma tge ch'ins vesa sa mida er en il decurs da la notg e l'onn cun quai che la terra gira enturn sasezza ed enturn il sulegl.
Chartas geograficas dal tschiel
Per quai datti applicaziuns per il computer, il tablet u il telefonin nua ch'ins po dar en – u manualmain u automaticamain – il lieu ed il temp. E suenter vesan ins il tschiel sco ch'el è sur nus en quel mument: la mesa culla sur noss chau cun ulteriuras infurmaziun sco ils nums da las stailas, ils planets u las constellaziuns.
I dat fitg bleras applicaziuns ed il meglier è da pruvar ora in pau, per las bleras datti er ina versiun gratuita. Ma duas popularas èn Sky safari e Stellarium, Stellarium datti per tut las plattafurmas, per il computer ed ils telefonins. Normalmain na datti er betg be planets e stailas ma per exempel satellits u la staziun spaziala internaziunala.
Agid cun realitad augmentada
Autras apps fan anc in pass e dovran l'uschenumnada «augmented reality» u la realitad augmentada, quai vul dir che las apps augmentan la realitad cun infurmaziuns or da noss telefonin. Cun agid da la camera ed auters sensurs è l'app lura buna d identifitgar tge ch'è gista en tschiel davos noss telefonin. Sch'ins vesa ina gruppa da stailas interessanta, pon ins tegnair il telefonin vers il tschiel e lura declera l'app tge ch'ins vesa.
Grazia a la camera guarda quai lura ora sco sch'ins tegness ina folia transparenta cun infurmaziuns sur il tschiel. Lura vesan ins per exempel il Jupiter u l'ensaina Giomber. I dat er qua differentas apps cun differentas funcziuns e per differents pretschs. Skyview è ina tala app enconuschenta.
Ins dovra dentant in telefonin relativamain bun pervi dals sensurs e la camera che duai funcziunar er en il stgir. Igl è anc adina impurtant d'esser precaut cun chargiar giu applicaziuns.
