La cifra: 70'000 giagliners

In problem saja che las persunas che veglian tegnair giaglinas, na sajan savens betg infurmadas avunda bain. Ed i dettia anc adina da cumprar giagliners che sajan tenor la lescha memia pitschens. Il giagliner sto esser minimum dus meters quadrats e la pussaivladad da pudair ir ordavert stoppia era esser uschè gronda per duas enfin sis giaglias, quai tenor la lescha davart la protecziun d'animals. Plinavant stoppian ins tgirar mintga di las giaglinas e schubregiar il giagliner.
Atgnamain è il servetsch veterinar da mintga chantun responsabel per las controllas dals giagliners. Dentant saja grev da far conscienziusamain controllas perquai che blers na annunzian betg ch'els hajan giaglinas.
Sche tuts giagliners vegnissan registrads fissi per l'ina pli simpel da far controllas e per l'autra vegniss era la prevenziun d'epidemias meglra. Perquai datti era ina campagna da l'Uffizi federal da segirezza alimentara e fatgs veterinars ensemen cun l'Organisaziun svizra per la protecziun d'animals per far attents sin il bainstar dals animals e cunzunt d'animar ils privats da registrar ch'els tegnian giaglinas a chasa.