Claustra da Glion

Las soras dominicanas da Glion elavureschan da preschent ina strategia d'immobiglias e tschertgan dievers alternativs per las localitads da la claustra.

Autur:a: Franco Caviezel

Ellas vegnan a dar en locaziun u vender ils bajetgs ch'ellas na dovran betg pli per l'agen diever. In exempel concret è l'«Albertushof» ch'è actualmain mess en vendita. Il possess agricul n'è gia in temp betg pli in sectur che las soras dominicanas mainan. Il cussegl da fundaziun da las soras dominicanas ha d'evaluar cun agid da spezialists, tge che fetschia economicamain pli bler senn, uschia la priura generala, Sora Annemarie.

Singulas contribuziuns

Zum Audio

Nova strategia d'immobiglias

Durada 5 minutas 33 Secundas , Franco Caviezel

Vender u dar en locaziun. Quai vegnan las soras dominicanas da la Claustra da Glion a far adina dapli.

Il motiv principal per quest pass saja la digren da la cuminanza dominicana a Glion, di la priura generala. Las soras na survegnan naginas novas commembras e la vegliadetgna media da las soras è sur 80 onns. Quest signifitga che ellas èn memia veglias per pudair lavurar en l'agen manaschi sco er en l'economia privata.

Zum Audio

In monument architectonic

Durada 5 minutas 36 Secundas , Franco Caviezel

Las soras dominicanas vivan en in bajetg marcant che giascha sin la spunda da Quinclas sur Glion. Fin dals onns sessanta han las soras incumbensà cun Walter Moser in architect da Turitg.

L'um ch'ha ussa passa 90 onns, ha bajegià 17 baselgias novas e renovà anc dapli bajetgs sacrals durant sia vita. El sa regorda gugent vi da la Claustra da Glion, ina da sias pli impurtantas ovras.

Zum Audio

Ina damaun tar las soras dominicanas

Durada 8 minutas 14 Secundas , Franco Caviezel

Tgi che guarda da Glion en direcziun Ladir vesa sin la spunda in grond bajetg alv e modern. Quai è la claustra da las soras dominicanas. Il mument fan las soras che vegnan adina pli paucas ponderaziuns davart lur immobiglias. Ma ellas fan era quai ch'ellas fan mintga di, lavurar ed urar.