En il fratemp èsi grev d'ignorar quai. Stads memia chaudas e sitgiras, privel d'incendis da guaud e peschs morts en ils flums pertutgan er nus, di per di ed adina pli ferm. La muria d'insects è fatga dals umans gist tant sco las muntognas da vestgadira veglia en il desert d'Atacama.
En vista a tut quests fatgs desastrus pudess ins desperar. E qua cumenza noss gir en il Museum per communicaziun a Berna tras l'exposiziun actuala «Planetopia – Raum für Weltwandel». «Nus vulain porscher propostas e vias per ina soluziun», di il curatur da l'exposiziun Ueli Schenk en discurs cun Anna Serarda Campell. Quest'exposiziun na less betg be animar da pensar, mabain da propi er agir. En l'emissiun Vita e cretta udis pertge che blers pitschens pass fan ina differenza.
